Saqqummersitsineq juunip 20-anni ammarneqartussaq taaguuserneqarsimavoq, Greenland Expo - Business and Investment Potential, kalallisuunngorlugu; niueqatissatut aningaasaliiffigisassatullu piukkunnaatillit. Pisortat namminersortullu suliffeqarfii 27-t saqqumersitsinermut peqataaniarlutik nalunaarsimapput, ilaatigut ilusilersuisartut eqqumiitsuliortullu aamma peqataassapput.
Saqqummersitsinermik aaqqissuisut tassa; Kommuneqarfik Sermersooq, Namminersornerullutik Oqartussat, Sulisitsisut - GA, Branding Greenland, sulisitsisut peqatigiiffiat NUSUKA, KaNuKoKa kiisalu Nunatsinni takornariaqarnermut niueqatigiinnermullu siunnersuisoqatigiit - GTE.
Suliffiutillit niuertullu saqqummersitsineq aqqutigalugu niueqatigisinnaasaminnik nunanit 20-ninngaaneersunik naapitaqarsinnaapput, Nunanit avannarlerniit Nunavumiillu aamma tikeraartoqarnissaata saniatigut naalagaaffiit aallartitaat ambassadørit 14-it tikissapput, soorlu USA-miit, Ruslandimiit Japanimiillu.
Taakkua saniatigut nunani assigiinngitsuni tusagaassiutineersut 35-t namminersulernissatsinnut alapernaakkiassapput.