Nunarsuarmioqatigiit ataasiunerulernissaat ilimagineqarpoq

-Maannakkut minutsini marlunni nunarsuatta siunissaa nipaatsumik qinnutsigu.

Jonathan Motzfeldtip tikilluaqqusinini naggaserlugu oqarpoq, peqataasullu upperisani qulinngiluaneersut tamarmik iluliarsuit saanni tusagassiortut saallugit qinnussipput.

Nunani aggerfiini upperisamik aqutsisut tusarniarneqartartorujussuugamik isumaqarpunga maaniinnerat sunniuteqarsinnaasorujussuusoq, Ujarassiooq professori oqalugiartunut ilaasussaq, Minik Rosing, oqarpoq.

Nipaallisimanermi ataasioqatigiittutut misigivugut, Buddhisteq Lee Young-ho, Dharma malillugu Jinwolimik atilik, oqarpoq.

Kristnamurti Panchapakesan, Hinduusoq Indiameersoq, oqarpoq, misigisaq annertooq tupinnartuusoq, nunarsuarput ataasinngoriartortutut immat, nunarsuarli minguinnerulissappat iliuuseqartoqarnissaa, ilinniartitaanermillu annertusaanissaq, aqqutissaasorinerarpaa.

Tassa upperisat assigiinngitsut qulinngiluat nipaallisimallutik immikkut eqqarsaatiminni namminneq oqaatsitik atorlugit qinuteqatigiipput.

Taamatut nipaatsumik qinoqatigeereernerup kingorna isumasioqatigiinneq umiarsuarmi ingerlanneqalerpoq, ilisimatuullu, politikerit kattuffiillu assigiinngitsut, uppertut assigiinngitsut peqatigalugit, ulluni tulliuttuni oqallillutillu paasisassanik pissarsiortussapput.

Umiarsuaq ataatsimeersuartullu kujammut aqagu aallassapput Nuummut ualikkut tallimanut tikissallutik.