Nunarsuarmi tamani ilinniartitsisut ulluat
Naalagaaffiit peqatigiit nunarsuaq tamakkerlugu ullumikkut ulloq ilinniartitsisunut ulloritsippaat. Nunarsuarmi meeqqat tamarmik ukioq 2015-imi atuartinneqarsinnaassappata ilinniartitsisut 18 milliuunit amigaatigineqarput, taama Naalagaaffiit peqatigiit ilinniartitaanermut immikkoortortaqarfianit UNESCO-mit naliliisoqarpoq.
Allattoq Oline I. Olsen
oktobarip 05-at 2008 13:16
Nunatsinni ilinniartitsisut 400-t tungaanut amerlassusillit ullumikkut amigaatigineqartut, ilinniartitsisut kattuffianni siulittaasup Sivso Dorph-ip oqaatigaa. Ilinniartitsisussaaleqinerlu atuarfitsialammut aporfiunerpaasartoq oqaatigalugu.
Afrikami ilinniartitsisussaaleqineq malunnarnerpaavoq, Afrikami naalagaaffiit assigiinngitsut akornanni iliniartitsisut atorfii 3,8 millionit inuttaqanngimmata. Rwanda-mi Mozambique-milu ilinniartitsisussaaleqineq annertungaarmat, atuartut 60-it tungaanut amerlatigisut ataatsimoortinneqarlutik ilinniartinneqartarput. Nunarsuarmi meeqqat tamarmik atuartinneqalissappata ilinniarsimasunik ilinniartitsisussarsiorneq unamminarnerpaajusoq, Nalaagaafiit Peqatigiit tusagassiutinut nalunaarutaanni erserpoq.
