Nunarsuarmi kaattut amerliartuinnavipput
Nunarsuarmioqatigiit ukiut qulit matuma siornatigut neriorsuutertik, tassa 2015 nallertinnagu nunarsuarmi inuit perlilersut amerlassusaasa affaannanngortinnissaat, iluatsinnavianngilaat.
Taama isumaqarpoq ikiuiniaqatigiiffik Oxfam, sapaatip-akunnerata ingerlanerani nunat tamat nunarsuarmi nerisassaaleqineq pillugu Romami ataatsimeersuarnissaat sioqqullugu.
Oxfam naapertorlugu inuit nunarsuatsinni 854 millionit perlilerput, allatut oqaatigalugu nunarsuarmiut arfineq-marluugaangata ataaseq perlilersuusarpoq.
Taakkunannga inuit 200.000-it Afrikap kujataani inuupput. Nunarsuaq tamakkerlugu perlilersut affaat meeraapput. Inuillu 54 millionit erniinnaq nunarsuarmi perlilersunut ilanngunneqartariaqassasut Oxfam-imit ilimasaarutigineqarpoq taakkualu erseqqissarpaat maannakkut qanoq iliuuseqartoqartariaqalersoq.
Nunarsuarmioqatigiit 1996-imili neriorsuimmatali Afrikamiut perlilersut tallimararterummik amerleriarsimapput, nunat tapersersuisut nunaateqarnermik ineriartortitsiniarlutik misiliigaluarnerat iluatsinngitsooreersorlu.
