Nunarsuarmi inussiaateqarneq suli atugaaqaaq
Arnarpassuit meerarpassuillu millionit missaani amerlassusillit piumanngikkaluaraangataluunniit ukiut tamaasa nunanut nalusaminnut inussiaatissatut tuniniarneqartarput. Pisiarineqartartut amerlanersaat atornerlugaallutik atortittartunngortinneqartarput.
Ajornartorsiut alligaluttuinnarpoq, ippassarlu USA-mi filmi takutinneqaqqaartoq ateqarpoq “Trade” filmimi malinnaavigineqarput arnat inuusuttunnguit marluk aallarunneqartut;
- Pinerlunniartartoqatigiinnit soqutigittaaqisunit niviarsiarannguaq 13-inik ukiulik Mexicomi aqqusiniinnarmi tiguneqarpoq aallarunneqarlunilu, kingornalu pisoorsuarmut USA-mi najugalimmut aningaasarpassuarnik akilersillugu internitsikkut tuniniarneqartussanngorluni.
Filmimi takuneqarsinnaasoq tassaavoq ajornartorsiut alliartuinnartoq piviusuusoq naakkittaattuliugaarnerusoq. USA-p naalagaaffimmi pissutsinut ministeriaqarfianiit naliliisoqarpoq ukiut tamaasa arnat niviarsiaqqallu 1,1 millionit aallarunneqartartut kingornalu tuniniarneqartarlutik sulisussatut atortitartunngortussatulluunniit.
Nalagaaffiit Peqatigiit oqaatigaat, ukiut tamaasa inuit inussiassatut niuerutigineqarneratigut 180 milliard kr.-nit sinnerlugit aningaasanngorlugit iluanaarutigineqartartut.
New York Times-ip allaaserisaa naapertorlugu ukiut pingasut matuma siorna inuit inussiassatut niuerutigineqartarnerat annertusigaluttuinnartoq pillugu filmiliorneq allartinneqarpoq.
Nunarsuatsinni piviusut aallaavigissagaanni inuit inussiassatut niuerutigineqartarnerat ajornartorsiutit annerpaartarinerpaat inunnik niuerniartartut tigusarineqarlutik eqqartuunneqarsinnaanerlutik,
nunarpassuarnimi pinerluffiusimasuni uppernarsarneqaqqaartariaqarmat arnat tigusarineqarlutik aallarunneqarsimasut ilumut arlaatigut pisooqataasimanersut !
