Nunarsuarmi aningaasaqarnermut oqartussaasut ataatsimeersualerput
Nunarsuaq tamakkerlugu aningaasaqarniarnikkut ajornartorsiortoqaleruttortoq naalagaaffiit sinniisaat nuimasut naapinnialerput.
Naalagaaffiit sinniisuisa unnugu ataatsimiilerunik qanoq ilillutik aningaasat kaaviijaartinneqaleqqissinnaanersut oqallisigissavaat. Ataatsimiittut ilaasa akileraarutit appartinnissaat, ilaasalu inuiaqatigiit akornanni aningaasartuutit qaffanneqarnissaat iluarsiissutaasinnaasutut saqqummiutissavaat. Kiisalu ilaasa, soorlu Tuluit ministeriunerata, Gordon Brownip akileraarutit appariarlugit inuiaqatigiit akornanni aningaasartuutit qaffanneqarnissaat orniginartinnerugaa naluneqanngilaq.
Aningaaserivinnut atatillugu, naalagaaffiit killeqarfii apeqqutaatinnagit atorniarnernut atukkiisarnernullu piumasaqaatigineqartartut nakkutigineqarnerulernissaat piumasarineqassaaq. Aningaaseriviit sukannernerusumik nakkutigineqalernissaat Europamiut piumasarigaat, amerikamiut killilersorneqanngitsumik niueqatigiissinnaaneq qimavissorusunngilaat, George Buship oqarneratuut; aningaasaqarnermik ingerlatseriaaseq ukiuni 60-ini ingerlalluarsimasoq, qaammatialunnguani ajornartorsiortoqarnera pissutigalugu qimanneqartariaqnngilaq. USA-mi præsidentinngortussaq, Obama ataatsimiinnissamut nammineq peqataassanngilaq, siornatigulli nunanut allanut ministeriusimasoq, Madelaine Albright Obama sinnerlugu peqataassaaq. Obama præsidentinngortinnani aalajangiiffiusussanut akulerunnaveersaarpoq. Præsident Bushimi isumaqatiginngisaminik saqqummiussissagaluarpat nipangiinnassaguni akerliliissagaluaruniluunniit kinaannguusaartoqannginniassammat. Taamaammat amerikamiut ilaasa ataatsimiinerup januaarimi Obamap præsidentinngoreernerata kingornanut nuunneqarsinnaanera piumasarigaluaraat europamiut piaartumik aaqqiissutissanik nassaarniarluni isumaqatigiissusiornissaq pingaartinneruaat.
