Nunarsuaq tamakkerlugu isiginnaagassiami arnaq kalaaleq pingaarnertut inuttaassasoq

Peter Høegip atuakkiaa Niviarsiaq Smilla apullu filmimik ilitsersuisartup Bille Augustip 1997-imi filmiliarimmagu Tului Nunaaneersoq Julia Ormond Smillamut inuttaavoq.

Maanna atuagaq taanna Tyskimit filmiliarineqalerpoq arfinilinnik immikkoortortalinnik.

Tamatumuuna Smilla kalaaliussaaq.

Kalaalimillu inuttassamik nassaarniarnissaq filmiliortartup Polaramap akisussaaffigissavaa.

- Smilla tassaavoq arnaq kalaallimik anaanalik qallunaamillu ataatalik, tunumiuuvoq. Atuakkami tunumiuuvoq, kalaaliuvoq affarmik qallunaajulluni, Danmarkimi najugaqarpoq nunarpullu maqaasillugu.

Polaramameersoq, Kuluk Helms taama oqarpoq.

Arnamik kalaallimik pingaarnertut inuttassarsiorneq

Kuluup nangeqattaartuliami Smillap kalaallimik inuttalerneqarnissaa nuannaarutigeqaa, taannaannaanngilarli.

Taassuma nangeqattaartuliap arnamik inuttatut pingaarneqarnera aamma nuannaarutigeqaa.

- Smillap filmiliarineqarnera uannut pingaaruteqarpoq pissutigalugu inuttaq pingaarnerpaaq arnaammat. Arnaavoq silatooq nukittuvoq, kisianni aamma qaratsamigut nukittuujuvoq, tarnia nukittoorujussuuvoq. Uannut pingaaruteqarpoq arnamik taamaattumik nangeqattaartuliamik takusinnaallunga.

Qallunaat nangeqattaartuliaanni ´Borgen`-imi DR1-ikkut aallakaatinneqartumi Polarama aamma inuttanik ujaarlernermi aamma suleqataanikuuvoq.

Katuami inuttassamik ujarlerneq

Smillamut inuttaarusukkaanni Nuummi Katuamut sapaammi marsip ulluisa 13-ianni takkuttoqarsinnaavoq, tassani nalunaaqutaq quliniit sisamat tungaanut periarfissaqarpoq. Smillamut inuttaarusukkaanni Nuummilu najugaqarani taava casting@polarama.is-imut videomik nassiussisoqarsinnaavoq.

Smillamut inuttassaq arnaassaaq 26-t 40-llu akornanni ukiulik.

Isiginnaartitsisartutut piginnaasaqarnissaq piumasaqaataanngilaq, tuluttulli oqallorinnissaq piumasaqaataassaaq, filmeq tuluttut ingerlanneqassammat.

Nangeqattaartuliaq aggustimi 2022-mit apriilimut 2023 tikillugu suliarineqassaaq, 2023-milu takuteqqaarneqassalluni.