Nunarput Washingtonimi sinniisoqarfittaangajalerpoq
Pilersaarutaavoq sinniisoqarfimmi pisortaq kalaaleq niuernikkut, suliffissuaqarnikkut aningaasarsiornikkullu nunatta aamma Amerikap Avannarliup akornanni attuumassutaasut nukittorsarniarlugit suliaqassasoq:
- Tassa pingaaruteqarpoq Nunatta nunat tamalaat akornanni suleqateqarnerata annertusarnissaa. Aammalu Nunatta oqaloqatigiumiunartuulluni ornikkuminartuunissaa aallartitaqarfitsigut aqqutissiuunniarparput nunat tamalaat suleqatitta akornanni annertunerusumik pissarsiaqarnissarput, aalisarnikkut, takornariaqarnikkut, niuernikkut allatigullu. Isumaqarpugullu aningaasaliinerusoq pitsaasuusoq. Nunatta nunarsuarmioqataaneranut erseqqarissoq, Naalakkersuisut siulittaasuat Aleqa Hammond taama oqarpoq.
Nunarput Københavnimi Bruxellesimilu ullumikkut sinniisoqarfeqareerpoq. Washington D.C.-milu sinniisuutitaqarfik Bruxellesimitut ingerlanniarneqarpoq:
- Tassa paasisimagatsigu aallartitaqarfipput Danmarkimi aammalu aallartitaqarfipput Bruxellesimi tassaasut aningaasaliinerit pitsaasut annertuumillu isumaqatigiissutinik nassataqartartut. Piffissarlu manna Naalakkersuisut aalajangersimavarput piffissanngortoq aamma kitaatungaanut isigaluta ammaanissatsinnut periarfissanngortoq. Aamma takusinnaagatsigu nunarsuarmioqatigiinni tamaninngaannersuni Nunatta soqutigineqarnera annertusiartortoq. Tamannalu piumasaqaatitaqarpoq uatsinnik aamma nammineq tikikkuminartuunissatsinnik aammalu oqaloqatigiuminartuunissatsinnik aallartitaqarfitsigut, Aleqa Hammond oqarpoq.
Aningaasanut inatsisissaq 2014-imoortoq akuerineqassappat pilersaarutaavoq 2014-mit Washington D.C.-imi sinniisoqarfimmik ammaanissaq. 2014-imi aningaasanut inatsisissami sinniisoqarfimmi sulisussamut ataatsimut aningaasarsiaritaasussat aningaasartuutissanullu naatsorsuutit katillugit 2,5 million koruunit immikkoortinneqarsimapput:
- Taassuma nassatarissavaa amerikkarmiunik maannamut suleqateqarnitta aningaasatigut kinguneqartumik nassataqalernissaanut aqqutissiuussissalluta. Aamma taassuma nassatarissavaa niuernikkut isumaqatigiissuteqarfigisinnaasagut toqqaannarnerusumik suleqatigisinnaalernissaannut. Tamannalu Nunatta aningaasaqarneranut, suleqateqarneranut tamatigut nukittoqutigilissavaa, Aleqa Hammond oqarpoq.
Washington D.C.-mi sinniisoqarfimmik ammaaneq qallunaat Nunanut Allanut Ministeriaqarfiat suleqatigalugu ingerlanneqassaaq, Bruxelles-imi sinniisoqarfimmi periuseq pisimasoq assigalugu. Sinniisoqarfik pilersinneqaruni Namminersorlutik Oqartussani Naalakkersuisoqarfinnik tamanik sullississaaq. Washington D.C.-mi sinniisoqarfiup 2014-mi aasalernerani ammarneqarnissaa pilersaarutaavoq.
