Nunarput uuliasiornissamut tamakkiisumik piareeqqanngilaq

Suliniutit angisuut assigiinngitsut, aatsitassanillu uranitaqarsinnaasunik Nunatsinni siunissami ungasinngitsumi piiasoqalersinnaanissaq Nunatsinnut qanoq isumaqassanersoq, Inatsisartut siulittaasuata Lars Emil Johansenip, ICC-llu siulittaasuata Aqqaluk Lyngep, Oqallinnermi, KNR Radiokkut ullaap tungaani aallakaatinneqartumi oqallisigivaat.
Allattoq Mads Lynge
novembarip 13-at 2013 08:28

Nunarput tamakkununnga, innuttaasullumi piareeqqappat?

- Massakkut piareersarlugu ingerlavugut, uagullu suliatsinnut pingaarnerpaavoq innuttaasut piareersarniarlugit aalajangiinissap tungaanut iliuusissat qanoq ittuussanersut, ICC-p siulittaasua Aqqaluk Lynge oqarpoq.

Innuttaasut paasissutissiiffigineqartarnissaat, suliniutinullu peqataatinneqarnissaat, ICC-p pingaartikkaa, taassuma aamma oqaatigaa.

Nunarput aatsitassarsiornissamut tamakkiisumik suli piariinngitsoq, Lars Emil Johansenip oqaatigaa, utaqqiinnartoqarsinnaannginnerarpaali:

- Inuppassuit piareersimapput, kisianni soorunami aamma ilaqarpoq piareersimanngitsunik. Piareersimanngitsut piareersartariaqalerput, pissutigalugu allaqqunneqarsinnaanngimmat Nunatsinni ineriartornerup maanna killiffia, Lars Emil Johansen oqarpoq.

Alloriarnissap tullia Nunatsinnut pingaaruteqarluinnartoq, taassuma oqaatigaa:

- Inuiannut ammasuuvugut uagut inuiaat kalaallit, taamaattumik isumaqarpunga ajornartorsiutaanavianngitsoq annertunerusumik. Allaanerusumik pissaqassaagut. Qallunaatut oqalussinnaanavianngilagut nunat allaninngaanneersuuppata. Tuluttut oqalunnerulernissatsinnut qularnanngitsumik aqqutissaalluarsinnaavoq, Lars Emil Johansen oqarpoq.

Nunattalu ineriartornerani alloriarnissap tulliata pingaaruteqarnera eqqarsaatigalugu inuiattut ataatsimoortariaqartugut, Aqqaluk Lyngep oqaatigaa:

- Apeqqummi aalajangersimasumi avissaartuunneq angusimagutsigu, taava kattunniartariaqarpugut. Taanna isumaqarpunga pingaartorujussuuviq inuiaqatigiinni kalaallini. Ataatsimoorluta ukua suliassaraavut. Avissaartuukkutta naammassinnissaa tamatsinnut ajornakusoortussaavoq, Aqqaluk Lynge oqarpoq.

Immap naqqani uuliasiorneq sapinngisamik tunuarsimaarfigisariaqaripput, Lars Emil Johansenip, Oqallinnermi aamma oqaatigaa:

- Imaq asattuutissavarput, nunalu aatsitassarsiorfigalugu. Tassa qajassuarnerpaamik iliorfigisinnaasarput, tassa uanga nammineq isumaga. Tamanna erseqqissartariaqarpara, uanga nammineq inuttut isumagaara immap naqqani uuliasiorneq sapinngisamik tunuarsimaarfigisariaqaripput, pissutigalugu imaq tassaammat inuiaat kalaallit inuuniarnerminni ukiorpassuarni tunngavigisaat, Lars Emil Johansen oqarpoq.

Taassumallu taama isumaqarnera, Aqqaluk Lyngemit ilalerneqarpoq:

- Lars Emil Johansenip immap naqqani uuliasiornermut tunngasoq oqaatigisaa, politikerit arlaannit taama oqartoqarnissaa sivisuumik utaqqisimavara, qujavungalu Lars Emil Johansenip tamanna oqaatigimmagu, ICC-p siulittaasua Aqqaluk Lynge oqarpoq.

Aamma atuaruk