Nunarput tusaamanerlugaalersinnaavoq
Suli nalunarput 2016-mi Arctic Winter Games-eqarnissaanik Nunatta aaqqissuilikkersaarluni nalunaarsimanini eqquutsissinnaanera. Aaqqissuisuunissamik qinnuteqaat oktobarip 15-iat tunniunneqarsimasussaagaluarpoq. Maanna Kultureqarnermut Naalakkersuisoq Mimi Karlsen aamma borgmester Asii Chemnitz Narup qinnuteqarput qinnuteqaat januarip 15-iat tunniukkumallugu. Kinguartitsineq Arctic Winter Games pillugu nunat tamalaat ataatsimiititaliaanni issittumi unammersuartarnerni oqartussani qullerpaajusumi ernumalersitsivoq.
Nalornissutaasut ilagaat sukuutsertarfissuarmik sananissaq taannalu pigineqassasoq piumasaqaataavoq Arctic Winter Games-imi aaqqissuisuussagaanni. Arctic Winter Games-eqartarnerani nunat pissaaneqarluartut Amerikap avannaamiut ishockey pingaartilluinnarpaat. Aammami 2016-mi aaqqissuisuunissamik ilimasaarummi Nunatsinniit nalunaarutigineqareerpoq sukuutsertarfiliortoqarumaartoq.
- Suli inissinngilarput aaqqissuussineq tamaat isigalugu aningaasalersorneqarnissaa. Taamaammat qinnuteqarnissamut killigititap kinguartinnissaa qinnutigisimavarput, Nunatta aaqqissuinissamik qinnuteqarnissaanut suleqatigiissitami siulittaasoq William Kriegel KNR-imut oqarpoq.
2002-mi Arctic Winter Games-eqarnerani Nunarput Nunavumi Iqaluit avitseqatigalugit aaqqissuivoq taamanerniillu ilimagisaasimavoq Arctic Winter Games 2010-mi Nunatsinni ingerlanneqassasoq. Kisianni tamanna 2014-mut kinguartinneqaraluareersoq kingorna 2016-mut kinguartinneqarpoq.
Maanna Arctic Winter Gamesimi nunat tamalaat ataatsimiititaliaat ernumalerpoq ilumut Nunarput 2016-mi aaqqissuisuunissamik qinnuteqassanersoq.
- Ministerit ataatsimiinneranni Nunatsinniit oqaatigineqareerpoq 2016-mi aaqqissuinissamut qinnuteqartoqassasoq. Taamatullu inissiisoqarpoq nunat allat isumaqatigiinniaqqaarlugit Kalaallit Nunaanniit 2020-mi aaqqissuussinissaq ungasigineqarmat, Arctic Winter Gamesimi nunat tamalaat ataatsimiititaliaanni nunarput sinnerlugu ilaasortat aappaat Peter Frederik Lyberth KNR-imut taama oqarpoq.
- Aarlerinarpoq kinguartitsisoqaqqissappat Nunatta Arctic Winter Games pillugu suleqatigiinnermi isigineqarnerata innarlerneqarnissaa. Aammami ernumanarpoq 2016-mi aaqqissuisoqanngeratarsinnaanera, takusinnaavarpummi aningaasanut inatsisissatut siunnersuummi sukuutsertarfissualiornissamut aningaasanik immikkoortitsisoqarsimanngitsoq, Peter Frederik Lyberth oqarpoq.
Arctic Winter Gamesimi nunat tamalaat ataatsimiititaliaat kisimi ernumanngilaq.
- Alaskap guvernøria Craigh E. Campbell ministerit ataatsimiinneranni kingullermi oqarpoq, maanna Kalaallit Nunaata takutittariaqaleraa neriorsuutigisaminik eqquutsitsisinnaanini, Peter Frederik Lyberth oqarpoq.
Kalaallit Nunaatalu neriorsuutigisani eqquutsissinnaaneraa aatsaat januaarimi paasinarsissaaq taamanikkut paasinarsissammat Arctic Winter Games-imik aaqqissuinissap kinguartinnissaa qinnutigineqaqqissanersoq.
