Nunarput takusassiarineqalerpoq
Nunarsuarmi silaannaap allanngoriartorneranut atatillugu præsidentissatut USA-mi qinigassanngorteqataasimasup Al Gore-p paasissutissiinertut filmiliaritissimasaa taaguutilik "den ubekvemme sandhed" pillugu, TV aqqutigalugu tusaamasanik apersuisartup Oprah Winfrey-p Al Gore apersornialerpaa. Tassunga atatillugu kalaallit nunaanni sermersuup aakkiartuinnarneranut atatillugu Nunatsinni Takornariaqarnermi Inuussutissarsiornermilu Siunnersuisoqatigiit assilissat atukkiussaat takusassiarineqassapput.
Assit takutitassat Oprah Winfrey-p tv-kkut aallakaatitassiorfianut, Harpo Productionsimut, Chicago-miittumut nassiunneqarsimapput.
- Washington-imi Danskit aallartitaqarfianiit ippassaq kingusissukkut sianerfigineqarpugut, assinik atorniartoqartoq. Nunarsuarmi tamakkerlugu TV-kkut isiginnaartartut 100 millionit takusassaat naaggaarnavianngilagut. Aamma Baltimore-mut timmisartukkut angalasalertussaavugut, assillu takutinnissaat iluatinnaqaaq, Nunatsinni Takornariaqarnermi Inuussutissarsiornermilu Siunnersuisoqatigiinni tuniniaanermi pisortaq Niels Feerup oqarpoq.
The Oprah Winfrey show-i nunarsuarmi isiginnaarneqartartut nuannarineqarluartut ilagaat, nunanilu assigiinngitsuni 122-ini isiginnaarneqartarluni.
