Danmarkimi suliffeqarnermut ministerip Inger Støjbergip siunnersuutaa akuerineqassappat, Kalaallit Nunaat namminerisaminik sulitilluni ajoqusernermut inatsiseqalissaaq.
Kalaallit Nunaanni piniartut, aalisartut savaatillillu ataatsimoortumik sillimmasiisalernissaat inatsisissami immikkut sammineqartoq, Namminersorluni Oqartussani Sulitilluni ajoqusersimanermut sillimmasiisarfimmi allaffimmi pisortaq Kristine Nordby-Rachlitz oqarpoq.
Ataatsimoortumik sillimmasiisarneq maannakkumut pisussaaffiugaluartoq nammineq piumassuseq aallaavigalugu siunissami aalajangerneqartalissaaq.
- Tunngaviatigut allaanerussuteqangaarnavianngilaq, tassami sillimmasiinermik taama ittumik maannakkut atuereersut qularnanngitsumik inatsit nutaaq akikitsorlu atoqqiinnassammassuk, Kristine Nordby-Rachlitz oqarpoq.
- Sulitilluni ajoqusernermi inatsit atuuttoq Namminersorluni Oqartussani Sulitilluni ajoqusersimanermut sillimmasiisarfimmiikkunnaarluni Danmarkimi sulitilluni ajutoornermi aqutsisoqarfiup ataaniilissaaq, taamaasillutik sulisut katillugit tallimaasut nutaamik sulisitsisoqalissallutik.
Tamannalu sullissilluarnerulernermik aamma malitseqassasoq, Kristine Nordby-Rachlitzip ilanngullugu oqaatigaa.