Nunarput soqutigineqaqaaq

Ulluni makkunani nunani tamalaani nunarput nutaarsiassatigut ilanngunneqaqattaarpoq. Upperisarsiortut qullersaasa nunatsinniinnerannut atatillugu tusagassiortut malinnaasut nunarput, nunatta inui kiisalu silap pissusaata allanngoriartornera allaasereqattaarpaat.

Soorlu Indiamiut ullumi atuarsinnaavaat mingutsitsinerup kingunerisaanik nunatsinni panissaartut ernertaartunit amerlanerusarnerat.

Amerikami tusagassiorfiup CNN-ip nittartagaani siku aattoq pillugu videuliaq takuneqarsinnaavoq. Tuluit Nunaanni BBC septembarip arfineq-aappaanniit ulloq manna tikillugu ullut tamaasa nunarput pillugu allaatigisaqartarpoq – soorlu ujarassiooq Minik Rosing, rappertartoq Peand-El, naalakkersuisunut ilaasortaq Aleqa Hammond kiisalu Ilulissani iluliarsuit pillugit allaatigisaqartarpoq.