Nunarput Savalimmiullu illersornissamut politikkimut peqataanerutinneqartassapput

Nunarput Savalimmiullu illersornissamut politikkimut peqataanerutinneqartassapput.

Illersornissamut ministeri, Trine Bramsen (S), taama isumaqarpoq, Danmarkillu Issittumiinnerunissaanut suliniutinik aallartitsiniarluni.

- Kalaallit Nunaat Savalimmiullu illersornissamut politikkimut tunngasut pillugit qaninnerusumik aalajangersimasumillu pisartumik oqaloqatigisassavagut, Trine Bramsen tusagassiuutinut nalunaarummi oqaaseqaateqarpoq.

Qaninnerusumik suleqatigiittoqalerpat atorfilittat nunatsinneersut ilinniarnissaminnut periarfissagissaarnerulissapput.

- Kalaallit Nunaannit Savalimmiuniillu atorfilittat illersornissaq pillugu ilisimatusarfiup ilinniarfiinut isertissinnaalersillugit sillimaniarnermut politikkimut tunngasunut piginnaasaminnik ineriartortitsinissamik periarfissinnissaat kissaatigaara.

- Tamatuma saniatigut kalaallit qatserisartut upalungaarsimanermut ajornannginnerusumik ilinniaqqinnissaannut neqerooruteqarniarpunga, illersornissamut ministeri oqarpoq.

Pissangartorsiorfiunngitsoq

Issittoq naalagaaffiit akornanni politikkikkut pingaaruteqaleriartormat illersornissaqarfiup Issittumiinnerulernissaa pissusissamisoortoq tusagassiuutinut nalunaarummi allaqqavoq.

Illersornissamut ministerip issittumiinnerunissamut Atlantikullu avannarpasissuaniinnerunissamut qanoq iliortoqarnissaanik kissaateqarnersoq tusagassiuutinut nalunaarummi allaqqanngilaq.

AAMMA ATUARUK USA-p nunanut allanut tunngasunut ministeriata Issittoq pillugu suleqatigiinnerunissaq kissaatigigaa

Issittulli eqqissisimasuuginnarnissaa danskit naalakkersuisuinit kissaatigineqartoq, tusagassiuutinut nalunaarummi allaqqavoq.

Kalaallit sakkutuujuffissamik atuinissaat illersornissaqarfimmilu sulilernissaat qanoq ajornannginnerulersinneqarsinnaanersut atorfilittat misissuinissaannik illersornissamut ministerimit qinnuigineqarput.

Naalakkersuisoq: Qujanarpoq

Aamma upalungaarsimanermut aqutsisoqarfik nunatsinni oqartussat suleqatigalugit nunatsinni qatserisartut nunatsinni pissutsinut naleqquttunik pikkorissarsinnaanissaanut neqeroorfigineqarsinnaanersut pillugu misissuinissamik qinnuivigineqarpoq.

Suliniutit nunanut allanut tunngasunut naalakkersuisumit Ane Lone Baggerimit nuannaarutigineqarput.

- Illersornissamut ministereqarfimmik suleqateqarluarnitta ilinniarnissamik neqerooruteqarnerunermik ilaneqarnera nuannersuuvoq. Aamma Kalaallit Nunaanni ajunaartoqarnerani ajunaarnersuaqarneranilu sulineq immikkut ittuuvoq.

- Kalaallit Danmarkimi upalungaarsimanermut tunngasunut ilinniartut qimuttuitsunik ajutoorneq pillugu ilinniarnissamik atorfissaqartitsinngillat. Taarsiullugu qatserinermut, annaassiniarnermut taavalu qarsutsisoqartillugu umiarsuarnillu ajutoortoqartillugu ikiuunnissamut sungiusarneqassapput, Ane Lone Bagger tusagassiuutinut nalunaarummi oqaaseqaateqarpoq.