Nunarput pillugu meeqqanut aallakaatitassiaq nangeqattaartoq nersornaasigaanngitsoortoq
Danmarks Film Akademip ukiumoortumik nersornaasiisarneranut atatillugu filmiliat 27-t nersornaaserneqartussatut ukioq manna innersuunneqarput.
Nunarput pillugu meeqqanut aallakaatitassiaq nangeqattaartoq "Min bedste vens historier" TV-mut nangeqattaartulianut nersornaaserneqartussatut innersuunneqartunut ilaavoq. Arfineq-pingasunik ukiullip, Theodorip, kammaginerpaasani Wilhelm isiginnaagassiami Kalaallit Nunaannut tikeraarpaa.
Isiginnaagassiarli "Min bedste vens historier" nersornaaserneqanngilaq.
TV-mut nangeqattaartuliaq "Bedrag", peqquserluttuliornermut tunngasoq, DR-ikkullu takutinneqarsimasoq Robert Prisenimik nersornaaserneqarpoq.
AAMMA ATUARUK Nunarput pillugu meeqqanut aallakaatitassiaq nangeqattaartoq nersornaasigassatut innersuunneqartoq
Tone Mygind Rostbøllilli nangeqattaartuliani nersornaaserneqartussatut innersuunneqarnera nuannaarutigaa.
Instagramimi tamanna nammineq allaaseraa:
- Ulloq ataaseq qaangiutereerpoq, Robertimilli pissarsinngilanga. Taamaattoq innersuunneqarnera nuannaarutigaara, meerarpassuillu nangeqattaartuliatsinnik isiginnaarsimammata, Theodorilu Wilhelmilu Kalaallit Nunaannut misigisassarsiornerannik malinnaasimammata, Tone Mygind Rostbøll, taama ilaatigut allaaserisaqarpoq.
Meeqqanut aallakaatitassiaq nangeqattaartoq, ’Min Bedste Vens Historier’, arfineq-pingasunik immikkoortoqarluni Nuummi nangittaqattaartuliaasoq meeqqat marluk nunatsinni misigisassarsiarnerannut tunngavoq. Meeqqat ilaatigut aavariarput, aliortukkanit qimaapput illoqarfimmiittunillu tamanik kaffisoriartoqqusillutik.