Nunarput nutaamik nunap assiliorneqassaaq
Nunatta 16 procentiata uuttortarneqaqqaarnissaa Mærskip aningaasaateqarfiinit aningaasalersorneqassaaq.
Nunatta maannakkorpiaq ilusaa, nunat assitoqaannitut iluseqarunnaassaaq.
Danskit silap pissusaanut, avatangiisinut pilersuinermullu tunngasunut ministeriat Lars Christian Lilleholt oqaluttuarpoq pilersaarutigineqartoq Geodatastyrelsip ukiut tulliuttut marluk ingerlaneranni nuna 82.000 kvadratkilometerisut annertutigisoq, tassa Danmarkip aappaa avillugu angeqataatut isorartutigisoq uutortarneqassasoq.
- Tamatuma kingunerissuaa, ilisimasat nutaat atornerisigut, nunap assingi ilaatigut ukiunik 50-nik pisoqaatigisut nutarterneqarnissaat. Pilersaarutip piviusunngornissaanut kalaallit danskillu sinnerlugit assut nuannaarpunga, ministeri oqarpoq.
Mærskip aningaasalersussavaa
GPS aamma qaammataasat atorlugit uuttortaanertigut nunap assiliornerit nutaat ingerlanneqassapput. Tamakku inerneri atorlugit nalilersorneqassaaq Kalaallit Nunaanni sermeeruttut pissutigalugit nutaamik nunap assiliortoqassanersoq.
Aningaasaateqarfiit Mærskimeersut katillugit 15 millioner koruuninik pilersaarummut aningaasaliissapput.
Taakku aningaasaliisorineqassapput danskit aningaasanut inatsisaanni tamatumunnga aningaasassarsisoqarsimanngimmat, naak akisussaaffik suli danskit tigummiaraluaraat.
Taama oqarpoq danskit silap pissusaanut, avatangiisinut pilersuinermullu tunngasunut ministeriat Lars Christian Lilleholdt. Taanna ulluni makkunani Nunatsinniippoq.
Uuttortarneqartussat tassaagallarput nunap ilaa Qeqertarsuup tunuaniittoq, Tasiilap eqqaaniittoq, Tunumiittut Zackenberg aamma Daneborg; kiisalu nunap ilaa Narsap Nanortallillu akornanniittoq.
