Nunarput Nunavullu atsioqatigiipput
Nunatsinni naalakkersuisut siulittaasuat Hans Enoksen Nunavummilu naalakkersuisut siuttuat Paul Okalik Iqalunni ullumi persuarsiorpalaartumik siunissami niiveqatigiinnissaq pillugu atsioqatigiipput.
Isumaqatigiissummi siunertarineqarpoq nunat taakku marluk akornanni assigiinngitsutigut suleqatigiissutigineqarsinnaasut nukittorsarneqarnissaat, soorlu; suliffeqarfiit, niivernermik ilinniarfiit, peqatigiiffeqarnerillu.
Taamatuttaaq puisit amii eqqaanngitsoorneqanngillat, illuatungeriillu isumaqatigiissutigaat siunissami puisinniariaatsit pillugit iluamik paasissutissiisoqartarlunilu puisit amiinik niiverneq qaffassarniarneqassasoq.
Isumaqatigiissummi suleqatigiinnermi pitsanngorsaavigineqartussatut taakkartorneqartut allat tassaapputtaaq, ataqatigiinnermut aaqqissuussinerit, nerisaqarneq, aningaasaliinerit, takornariaqarneq kiisalu aatsitassanut ikimmatissanullu tunngassut.
Isumaqatigiissullu ima kinguneqassaaq nunat taakku marluk ukiut tamaasa politikkikkut oqallillutik atsioqatigiissutigineqartunik ineriartortitsisalissasut.
Aammattaaq Hans Enoksen pisortatigoortumik Nunavumiinnermini Iqalunniittussamik danskit aallartitaqarfissaannik ammaavoq.
