Ajorsarnerit marluk: Nunarput nunarsuarmi pissartanngorniunnermi ingerlaqqinngitsoortuni unammissasoq
Kalaallit arnat U18-it assammik arsarnermi nunanut allanut unammisartut U18-it nunarsuarmi pissartanngorniunneranni unamminerni tallimani unamminermini suli ajungaanngillat.
Kalaallit gruppiminni unamminerni pingasuni siullerni ajorsareerlutik "Presidents Cup"-imi sapaatip akunnerani matumani aallartittumi unammilerput.
Tassanilu Argentinamut Kazakhstanimullu unamminerminni aamma ajorsarput.
Naalli kalaallit arnat inuusuttut suli ajugaanngikkaluarlutik unamminerit kingulliit marluk pissanganarluinnartumi unammiffigaat.
Nunatsinneersut Argentinamut ataasinngormat unammigamik aallartilluarput, unammisaammi minutsini siullerni qulingiluani isertitsinngillat, namminnerlu pingasoraarsimallutik. Tamatumali kingorna unamminerup sinnera naligiipajaaginnalerput, pingasunillu kinguarsimallutik unammineq 22-19-imik naammassivoq.
![](/sites/default/files/styles/image_934x467/public/2024-08/456307367_402760379491898_527346395806186280_n.jpg?h=3dfce949&itok=qDlQN-Ch)
Kalaallit arnat Kazakhstanimut ullumi unammipput, unamminerlu taanna aamma naligiiffiungaatsiarpoq.
Kalaallilli sisamanik kinguarsimallutik 24-20-mik ajorsarput.
Pilunnguaq Olsen Petersen unamminermi taakkunani marlunni kalaallini isertitsinerpaavoq.
Kalaallit ajugaaniarnissaminnut suli marloriarlutik unammisussaapput. Sisamanngorpat Chilemut unammissapput tallimanngorpallu Guineamut Canadamulluunniit unammissallutik.