Nunarput NORA-mi siulittaasuutitaqalerpoq
Jørn Hansen Nutaaliorfimmi aamma issittumik ingeniøritut ilinniarfimmi ARTEK-mi Sisimiuniittumi siulersuisuni ilaasortaavoq.
Jørn Hansen ukiumi tulliuttumi NORA-mi siulittaasuussaaq. NORA tassaavoq Nordisk Ministerrådip ineriartortitsinermut suleqatigiiffia, Nunatta, Savalimmiut, Islandip aammalu Norgip sineriammiuinit peqataffigineqartoq. Nunani taakkunani inuussutissarsiutinik ineriartortitsinissamut suliniutini NORA aningaasalersueqataasarpoq.
Nunat NORA-mi ilaasortaatitallit tamarmik immikkut ataatsimiititaliami pingasunik ilaasortaatitaqarput. Jørn Hansenip saniatigut Nunatta ilaasortaatitarai Nunatta Bruxellesimi sinniisoqarfianni siunnersorti Lida Skifte Lennert amma savaatilinnut siunnersorti Kenneth Høegh.