Nunarput NATO-mi siullerpaamik maanna sinniisuutitaqalersoq
Naalakkersuisut aamma Nunanut allanut tunngasunut ministereqarfiup Danmarkip NATO-mut aalajangersimasumik sinniisoqarfianut kalaallimik aallartitsinissartik isumaqatigiissutigaat. Nunanut allanut tunngasunut, Inuussutissarsiornermut Niuernermullu Naalakkersuisoqarfik tusagassiuutinut nalunaarummi allappoq.
Tusagassiuutinut nalunaarut naapertorlugu siunnersortaaneq, Lida Skifte Lennert Issittumi pissutsit pillugit immikkut ilisimasaqarnerminik NATO-mi ikiuutissaaq.
Kalaallip sinniisuutitap toqqarneqarnera Ruslandip Ukrainemut sakkutooqarnikkut sakkulersorneranik ilaatigut tunngaveqarpoq, tamannalu naalakkersuisoqarfiup oqarnera naapertorlugu nunatta isumannaallisaanikkut pissutsinik ilisimasaqarnerulernissaq pisariaqartinnerulerpaa.
- Kunngeqarfiup Danmarkip sinnera peqatigalugu Kalaallit Nunaat NATO-mut, ukiuni makkunani Avannaarsuanut isigiumaneqaleraluttuinnartumut, ilaasortaavoq. Pissutsit taama ilisimanerat ukiuni aggersuni Kalaallit Nunaanni Naalakkersuisunullu pingaaruteqarnerujartuinnassaaq, nunanut allanut tunngasunut, inuussutissarsiornermut, niuernermullu naalakkersuisoq, Vivian Motzfeldt oqarpoq.
Atorfineqqammersoq Lida Skifte Lennert Naalakkersuisut ataanni qitiusumik aqutsisoqarfimmi ukiunik 25-nik misilittagaqarlunilu ukiut 14-it sinnerlugit sinniisuutitaqarfimmi pisortatut misilittagaqarpoq.
Lidap sulilernissani qilanaaraa. Taassuma oqarnera naapertorlugu nunatta NATO-mi sinniisuutitaqalernissaa – nunatsinnut Danmarkimullu pingaaruteqarpoq:
- Atorfik assorsuaq soqutiginarpoq assoroornartoqassallunilu. Isumannaallisaanikkut politikkimut tunngasutigut suleqataalernissara qilanaareqaara. Tamatumani nunatsinni avataanilu misilittakkakka atorluarsinnaassavakka. Annermilli Kunngeqarfiup Danmarkip NATO-mut aalajangersimasumik sinniisuutitaqarfiani kalaallit nipaat nutaartaassaaq, aammali kunngeqarfiup issittoq eqqarsaatigalugu NATO-mi pingaarnerutitaanik sulissuteqarneranut nukittorsaataassalluni, Lida S. Lennert oqarpoq.
