Nunarput Kinalu suleqatigiinniartut
Naalakkersuisuni ilaasortat sisamat Kinamut pisortatigoortumik novembarip aallartinnerani tikeraarmata aatsitassanut naalakkersuisoq, Muté Bourup Egede, aamma peqataavoq. Nunatsinnilu aatsitassarsiorneq siuarsarneqassappat Kinap suleqatiginissaa avaqqunneqarsinnaanngitsutut isigaa.
- Aatsitassarsiornermi siuariartornissamik takorluugaqarutta Kina, nunarsuarmi aatsitassarsiornermi niuefiit annersaat, tassa pisisartut annersaraat, taamaalilluni aatsitassarsiornermi avaqqunneqarsinnaanngivissortut ilagilersimallugit, Muté Egede oqarpoq.
Aatsitassanut naalakkersuisup, suliffeqarffissuarnut assigiinngitsunut nittarsaassinermi saniatigut, Kinap aatsitassanut naalakkersuisoqarfiatut taaneqarsinnaasumik, Ministry of Land and Resourcesimik, ataatsimeeqateqarpoq. Maannalu suleqatigiinnissamik isumaqatigiissusiornialeruttorlutik.
Nunatta Kinallu isumaqatigiissutaata, paasissutissanik aatsitassaqarnermut tunngasunik attaveqaatinillu avitseqatigiinnissamik siunertaqartup, ukiup naanerani 2018-illuunniit aallartinnerani atsioqatigiissutigineqarnissaa siunniunneqartoq naalakkersuisoq ilisimatitsivoq.
AAMMA ATUARUK Kinami paatsoortoqarnera tusagassiortup pisuussutigaa