Naalakkersuisoqarfik: Kinami paatsoortoqarnera tusagassiortup pisuussutigaa
Kalaallit Nunaata kitaani uuliasiornissamut gassimillu ujarlernissamut 2018-imi ammaassisoqarniartoq. Imitassarsiorneq tamanut ammasuussasoq Naalakkersuisullu pitsaanerit toqqartassagaat, Aatsitassanut Naalakkersuisup, Muté Egedep Reutersimut oqaluttuariaa KNR-ip novembarip aallartinnerani allaaseraa.
Aammattaaq uuliamik gassimillu ujarlernissamut imitassarsiornissamut pilersaarut kingusinnerusukkut Naalakkersuisunut ilaasortap allap - tassa Inuussutissarsiornermut, Niuernermut Nukissiuuteqarnermullu Naalakkersuisup Hans Enoksenip illuatungileraa KNR-imit allaaseraarput.
Reuters naapertorlugu Hans Enoksenip tusagassiortunik katersuutitsinermi Kalaallit Nunaata nukissiuutinik ataavartunik ukkatarisaqarmat, uuliamik gassimillu ujarlernissamut imitassarsiornissamut pilersaaruteqannginnerarpaa.
Naalakkersuisunili isumaqatigiinngittoqanngitsoq, Aatsitassanut naalakkersuisoqarfimmi pisortap Jørgen Hammeken Holmip KNR-imut erseqqissaatigaa. Tusagassiortulli tungaanniit paasinerluisoqarsimanerarpaa.
- Reutersimi tusagassiortup paasinninnerani Naalakkersuisup Hans Enoksenip Naalakkersuisullu Muté B. Egedep akornanni uuliasiortoqarnissaanut imitassiortoqarnissaa isumaqatigiissutigineqarpoq. Isumaqatigiinngittoqaanerarneq ilumuunngilaq, KNR-imut akissuteqarluni allappoq.
Egedep nassuiaatigaa Enoksenip nunatta uuliamik atuinermik kiassaaneq atorunnaarlugit nukissiuutit mingutsitsinngitsut atorneqalernissaannik siunissamut kissaateqarnini oqaatigiinnarpai.
AAMMA ATUARUK Naalakkersuisut uuliasiornissamik Kinami paatsuunganartuliortut
