Nunarput ilinniartitsisunik 21-nik ullumi pisuunnguallassaaq
Meeqqat atuarfiini ilinniartitsisut 400-t pallillugit amerlassusillit amigaataapput, taamaattumik ilinniartitsisut nutaat 21-t Kalaallit Nunaannut tunissutaapput pitsaasut atorfissaqarluartullu, Ilinniarfissuup pisortaa Dorthe Korneliussen oqarpoq.
- Isumaqarpunga tunissut pitsaasoq. Soorurami ilinniartitsisut 21-t nutaat iluaqutaassapput atorfissaqarluassallutillu, oqarpoq.
Ilinniartitsisut Kattuffiata Imak-ip naatsorsuutigaa ullumikkorpiaq ilinniartitsisut 3-400-t nunatsinni amigaataasut.
Ilinniartitsisunngortullu amerliartuaartuarnissaat Ilinniarfissuarmi pisortap neriuutigeqaa.
-Pilerisaarutigisinnaavarput ilinniagaq soqutiginartoq assullu inuttut ineriartorfiusoq. Ilinniaqatigiit akornanni nuannersumik ilinniaqatigiinneq ataatsimoorfiusorlu neqeroorutigisinnaavarput, Dorthe Korneliussen oqarpoq.
Siorna ilinniartitsisutut naammassisut 19-iupput.
Ilinniartitsisunngorlaat 21-t Ilinniarfissuarmi tassuugu nalunaaqutaq qulinut allagartartaartinneqassapput.