Nunarput ikittunik, atorsinnaalluartunilli, ilinniarfiusinnaasunik pisariaqartitsivoq.

Qaffasinnerusumik ilinniagaqarnerit, soorlu inatsisilerituutut, nakorsatut assigisaattulluunniit ittut nunatsinnut nuuginnarnissaat imminut akilersinnaanngilaq, tassami inuiaat ikittuarannguuvugut. Tulluarnerussagaluarpoq savalimmiormiut islandimiulluunniit qanoq iliuuseqartarnersut qimerluualaassallugu, taakkuami inuusuttatik nunanut allanut illiniariartittarmatigik.

Ilinniartitaanerit sorliit nunatsinni ilinniarneqarsinnaanersut, sorliillu nunani allani ingerlanneqarsinnaanersut maannangaaq isummersuutigisariaqarparput.

Aamma Michael Binzerip isumaa malillugu inuusuttut nunatta akiligaanik qaffasinnerusumik ilinniariarlutik nunanut allanut aallartartut ilinniagartik naammassippassuk nunatsinni suleqqaartariaqarput taamaasillutik nunatta siuarsarneqarnerani qujaniutigalugu ikiuullutik. Ilinniagartilli naammassereerlugulu nunani allani najugaqaannarniarunik allatut ajornaqaaq nunatta aningaasartuutigisimasai utertittariaqassavaat.

Air Greenlandip pisortaanera inuiaqatigiinnut tunngassutilinnik Danmarkip Radioani taama isummersorpoq.