Nunarput EU-lu isumaqatigiissuteqarput

Nunarput EU-lu aalisarnermut nutaamik isumaqatigiissuteqarput, EU-p ministeriisa Bruxellesimi siunnersuisoqatigiiffiannit sisamanngormat akuerineqartumik.

Isumaqatigiissut nunatta EU-llu suleqatigiinnerannik ingerlareersumik nutarterineruvoq, nunatsinnullu aningaasanik ukiumoortumik 318 million koruuninik iluanaarutaasassaaq.

Aningaasaliissutinit 186 million koruunit EU-p ineriartortitsinermut tapiissutaatut nunatta karsianut nakkartinneqartassapput.

Aningaasat sinneri 132 million koruunit nunatta EF-mit 1985-mi aninerata kingorna EU-p nunatta imartaani aalisarsinnaanermut pisinnaatitsissummik pissarsinerminut akiliutigai.

Nutaamik isumaqatigiissuteqarnermi EU-p suluppaagartassai annertuumik ikilisinneqarput aamma EU tupissutinik pisassaaruppoq, Tunumilu qaleralittassai aamma ikilillutik. EU-p assagiarsuttassai aamma affaannanngorput.

Isumaqatigiissut nutaaq naapertorlugu EU-p nunatta imartaani pisassai ukiumoortumik isumaqatigiinniutigineqartassapput.

EU-p nunattalu aalisarnikkut isumaqatigiissutaat nutaaq talimanngorpat atuutilissaaq.