Nunarput Estlandilu VM-imi unammeqatigeerngaassapput

Angutit assammik arsarlutik nunarsuarmi pissartanngorniunnissaat Igitsinimi aggustip qaammataani pisussami, Kalaallit unammisassaat siulliit Estlandimiuussapput.
Allattoq Najaaraq Egede
maajip 22-at 2009 07:14

Kalaallit Nunaanni nunanut allanut unammisartut U21-it nunarsuarmi pissartanngorniunnissamut annguttut tappavani unammeqataassapput, pissartanngorniunnerillu aggutsip ulluisa arfernganit 19-ata tungaanut ingerlanneqassapput.

Nunatta unammisartui sisamanngornermi aggustip ulluisa arfernganni Estland-imut unammissapput.

Estlandimiut unammisartui ilisimaneqarpallaanngillat neriuutigineqarporlu Nunarput unamminermi tassani ajugaajumaartoq.

Kalaallit Nunaanni assammik arsartartut kattuffiannit aggustip ulluisa arfineq-aappaanni arfineq-pingajuannilu unamminissat mersernarnerorpasittutut aamma nalilerpaat, tassami kalaallit unammissammatigit Slovenia.

Aqaguani 8. august Sverigep unammisartui kalaallinut imaannaanngitsuusussaagunavissut aamma oqaatigaat.

Pissartanngorniulluni unamminermi Kalaallit unammissassaat kingulliit tassaassapput Holland aamma Libyen.

Unammisaqattaarnerit taakku pereerpata kingorna unamminerit ingerlaqqinnissamut qulakkeerutaasussat ingerlanneqassapput. Nunarsuarmi tamarmi assammik arsarluni pissartanngorniunnermi Danmark aamma peqataassussaavoq, taamaattumillu danskit unammisartuisa Kalaallit ingerlalluariarunik unammisinnaajumaassavaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq