Nunarput aningaasarsiornikkut imminut napatissinnaalerumaarpoq
Kalaallit Nunaata aningaasarsiornera naalagaaffiup tapiissutaanik 3,5 mia. koruuniusunik pisanngikkaluarluni kaaviaartinneqarsinnaanerpa? Aap, siunnersuisartoq Henrik Thomassen oqarpoq, kisianni imaaliallaannaq pinavianngilaq.
- Aap, periarfissaqarpoq, taamaattorli unamminartorpassuaqassaaq aatsaallu siunissami ungasinnerusumi pisinnaassaaq. Annertuumik suliniuteqaqqaarluni ukiorpassuit qaangiuppata anguneqarsinnaavoq, tassa ukiut immaqa 30-iniit 50-it qaangiuppata, Henrik Thomassen oqarpoq.
Grønlandsbanken Sulisitsisut Peqatigiiffiatalu suleqatigiillutik Henrik Thomassen nalunaarusiortippaat. Naalagaaffiup tapiissutai siunissami qanoq allamik taarserneqarsinnaanersut misissuineruvoq, tassalu aningaasaqarnikkut namminiilivinneq qanoq anguneqarsinnaanersoq pineqarluni.
Aningaasaqarnikkut namminiilivissinnaanermut aqqutissat pingasut Henrik Thomasenip tikkuarpai.
- Piviusunngortinneqassappat taava suliffissuaqarneq siuarsartariaqarpoq, soorlu aatsitassarsiornermi aluminiumik aatsitsiviliorneq assigisaalu. Aamma nunaqavissut sulilersinneqartariaqarput ilinniartitaanikkullu qaffassartoqartariaqarluni, Henrik Thomasen oqarpoq.
Ilinniarsimasut suli amerlanerusut pisariaqartinneqarput suliffeqarfiillu namminersortut suli amerlanerulertariaqarlutik. Nunaqarfiit inuerutinneqarnerisigut aningaasanik aamma pissarsisoqarsinnaavoq, tamannali, siunnersuisartup oqarnera naapertorlugu, aallaqqaammut akeqassaaq.
- Najugaqarnerup allanngortinneqarnera siunissaq qaninnerusoq eqqarsaatigalugu aningaasaliiffigineqartariaqarpoq. Pisortat sipaaruteqarneranik amerlanerusullu sulilersinneqarnerannik tamanna kinguneqassaaq, Henrik Thomasen nassuiaavoq.
Taassuma saniatigut pisortat sulisui ikilisarneqartariaqarput aalisarnerlu aningaasarsiutaanerusariaqarluni. Aningaasarsiornikkut namminiilivinniarnermi aamma akileraarutinik qaffaanissaq saneqqunneqarsinnaanngilaq.
- Akileraarutit qaffanneqarnissaat eqqarsaatit aamma ilagaat. Qanorli annertutigisumik qaffaasoqassanersoq oqaatigineqarsinnaanngilaq pissutsit allat apeqqutaammata, Henrik Thomasen oqarpoq.
Suut tamarmik iluatsissinnaappata Kalaallit Nunaata 3,8 mia. koruunit, naalagaaffiup tapiissutaanik taarsiisussat, kaaviiaartilersinnaavai.
Kalaallit Nunaata aningaasarsiornikkut namminiilivinnissaa pillugu nalunaarusiaq Grønlandsbankip Sulisitsisut Peqatigiiffiatalu ataatsimoorlutik suliakkiissutigaat. Nalunaarusiap ukiup nutaap aallartinnerani saqqummersinneqarnissaa naatsorsuutigineqarpoq.
