Nunarput Amerikami tuniniarneqarluarpoq
Kalaallit Nunaata USA-llu suleqatigiinnissamik isumaqatigiissutiginikuusaat tunngavigalugu, Branding Greenland illoqarfissuarmi Washington DC-mi ippassaq paasisitsiniaavoq.
Nunatsinnit peqataapput: Nunatsinni Takornariaqarnermi Inuussutissarsiornermilu Siunnersuisoqatigiit, Air Greenland aamma Greenland Venture, amerikami takornariat umiarsuarsui atorlugit takornarianik sullissiviit angalatitseqatigiiffiillu aatsaavissuaq tikillugit oqaloqateqartut.
- Paasisitsiniaanerput, takornariat umiarsui atorlugit Kujataani qanoq takornariartitsinerup siunissami innissaanik assut tikkuussisuuvoq, Destination South Greenlandimi sulisoq Tina Jensen ippassaq takutitsereerlutik oqarpoq.
Kalaallit Nunaata nunarsuup sinnerani ilisimaneqarnerulernissaanik nittarsaassisartut Branding Greenland aamma naammagisimaarinnipput.
Suliassarpassuaninnerarpummi.
Rob Roberts amerikamiut takornariussuanik Princess Cruisesimik angalatitsisartoqatigiinneersoq aamma naammagisimaarinnippoq.
- Takornarianik Kalaallit Nunaannukartitsisarnissara qulariunnaavippara. Nalunaaquttap akunneri arfinillit matuma siornagut taama eqqarsarsimanngikkaluarpunga. Takornariat sunik misigisassarsiorsinnaanerat suullu Kalaallit Nunaanni takornarianik sullissiviit tunniussinnaaneraat ilisimalerparput, Rob Roberts, ukiut tamaasa Princess Cruise-miit arlalippassuarnik nunatsinnukartitsisartoq oqarpoq.
