Nunarput aatsitassarsiorfissatut pilerigineqarnernerit appariartortoq
Fraser Institutip nunani 104-aasuni aatsitassarsiornermut atugassarititaasut qanoq kajungernartigineri ukiut tamaasa nalilersuiffigisarpai.
Aningaasaliisartut nunat qanoq kajungernartigineranut naliliineranni Nunarput 2016-imi 55-iutut inissisimavoq. Tamanna 2015-imut sanilliullugu 29-inik appariarfiuvoq.
Appariarneq nuanninngitsumik tupaallannartoq, GE-p oqaatigaa.
Pisortap Brian Buus Pedersenip tamanna nunatta kujataani aatsitassarsiornissamik pilersaarutit nalornissutaanerannik kiisalu naalakkersuisoqatigiit isumaqatigiissutaanni ”uranimik piiaanissamut erseqqinngitsunik” takussutissiinernik peqquteqarsoraa.
- Aatsitassalerinermut atatillugu taamaattut nunatsinni aningaasaqarnermut sukassatut isumalluutigineqarnerat ineriartornermi aatsaat kissaatigineqartutut piviusunngortinneqarsinnaapput, aningaasaliisinnaasut, siunissaq ungasissoq isigalugu, pitsaasunik patajaatsunillu sinaakkusiuunneqarpata, GE-mi pisortaq tusagassiutinut allappoq.
Aatsitassaqarnermut naalakkersuisoq Múte B. Egede aallartitat suliffeqarfiit 34-usut peqatigalugit Canadami illoqarfimmi Torontomi aatsitassarsiornermut tunngatillugu ulluni makkuni ataatsimeersuartoqarnerani peqataavoq.
