Nunarput aalisarneq pillugu EU-mut isumaqatigiissuteqarpoq

Nunarput aalisarnermut EU-mut isumaqatigiissuteqarpoq. – ajorisassaanngeqisorlu,

Danmarki sinnerlugu Europa-parlamentimi aalisarnermut ataatsimiititaliami ilaasortaq Ole Christensen oqarpoq.

EU-p Kalaallit Nunaannik aalisarnermik isumaqatigiissutaa pillugu nalunaarusiaq Europaparlamentimit taasissutigineqarluni ullumi akuerineqarpoq.

Ole Christensen Socialdemokratit sinnerlugit isumaqatigiinniartuusimasoq suleqatiminik nersualaarivoq.

- Ajorpianng’. Isumaqatigiissut Kalaallit Nunaannuinnaanngitsoq aammali Europami nunanut iluarinarluinnarpoq. Aammami oqallisigingaatsiarnikuugatsigu, Ole Christensen oqarpoq.

EU-p nunatta imartaani aalisarsinnaatitaanera katillugit 120 millioni koruuninik ukiumut isertitsissutaassaaq.

Taakku saniatigut imartatsinni aalisarnerup saniatigut suleqatigiissutit allat Namminersornerullutik Oqartussat 180 millioni koruuninik isertitsissutigissavaat.

Aalisakkat pisarinngitsuukkat nunanut allanut agguaateqqinnissaat siunertaralugu utertinneqartarnissaat, aalisarnermut isumaqatigiissut eqqartorneqarmat assortuussutaasimaqaaq.

Siornatigummi imaattarsimagaluarpoq, pisassat nunamut aalajangersimasumut allassimareersut allanngortinneqarsinnaasaratik. Tamannalu assersuutigalugu EU-mi nunat Kalaallit Nunaanni pisassaraluanik pisarineqanngitsoorneqartunilli annaasaqaataasarpoq.

- Soorlu spaniamiut Kalaallit Nunaanni aalisarusuttorujussuupput, taakkuuppullu ataatsimiititaliami, assersuutigalugu tyskit pisarinngitsuugaannik perusukkaluartut, Ole Christensen oqarpoq.

Aalisarnermut isumaqatigiissutip taasissutigereernerani paasinarsivoq, pisassatut isumaqatigiissutaareersut pisarineqanngitsulli nutaamik isumaqatigiinniutigineqartalissasut.

-Ajunngilaq, Kalaallit Nunaannut isumaqatigiissutitsialaammat angusaq ajorinngeqaarput, Ole Christensen isumaqarpoq.