Nunarput aalisakkanik isumaqatiginninniarnermi iluatsitsipput

Kalaallit Savalimmiormiullu aalisakkanik isumaqatigiinninniarnerminni kalaallit iluatsitsipput.

Aalisarnermut Piniarnermullu Pisortaqarfiup aallartitaasa pisortaat Jeanette Holding taama isumaqarpoq.

Siornatigut aalisakkat pisassiissutit Savalimmiut Kalaallillu nunaannut agguaanneqartartut annertussussaat assigiinngittarnikuugaluarput massakkulli assigiinnerullutik.

- Isumaqatigiissut iluarisimaaqaarput, massakkummi naligiinnerusunik pisassinneqaratta, Jeanette Holding oqarpoq.

Nunatta isumaqatigiinniarnerni pissarsiaasa ilagaat misileraalluni raajarniarnissamut pisassiissutit. Tassa imartani raajarnersoq ilisimaneqanngitsuni raajanut pisassiissutit.

Savalimmiormiut misileraallutik raajarniarnissamut pisassaat affaannanngorsimapput, 200 tonsimiit 100 tonsimut.

Savalimmiormiut aalisartui aamma misileraallutik saarullinniarnissaannut pisassiissutit millisinneqarput, 400 tonsimiit 250 tonsimut.

Savalimmiormiut imartaanni Kalaallit misileraallutik immap naqqani aalisakkanik aalisarsinnaasaat annikillisimapput.