Nunarput 30 milliard koruuninik amigaateqarpoq

Aningaasaqarnermut siunersuisooqatigiiffiup nalunaarusiornermini tamanna nalunaarutigaa.

- Siunnersuisooqatigiit tikkuagaat tassaavoq iliuuseqarnissamut periarfissat assigiinngitsut arlaqartut. Isertitatigut annertusaanissamut ujartuinissaq, imaluunniit aningaasartuutinut tunngatillugu millisaanissaq imaluunniit ilinniartitaanikkut amerlanerusut ilinnialersinneqarnissaat siunnerfigalugu aningaasaqarneq sukaterneqassaaq, Ulla Lynge, aningaasaqarnermut siunersuisoqatigiiffiani siulittaasup tullia taama oqarpoq. Siunersuisoqatigiiffik Naalakkersuisunit pilersinneqarnikuuvoq.

Kalaallit Nunaat ukiumut 1 milliard koruuninik ukiumut sipaaruteqartalertussaavoq. Taamaattoqaraluartoq Ulla Lynge isumalluarpoq:

- Siunnersuisooqatigiinni ilaasortatut nunatta siunissamut aningaasarsiornikkut ingerlatsinissaanut aqqutissat isumalluarnartunik ulikkaartut isumaqarpunga, Ulla Lynge oqarpoq.

Aningaasaqarnermut siunersuisooqatigiit nalunaarusiaminni uku saqqummiunniarpaat:

- Nalunaarusiami sammisimasagut oqaatigisinnaavakka, akit aningaasarsiornikkullu pissutsit allanngorarnerat misissorsimavarput. Taavalu aamma aningaasarsiornikkut politikkip ataavartumik ingerlanneqarnera sammisimallutigu. Aamma inuiaqatigiinni aaqqissugaanerup aningaasalersorneqarnera misissorsimallutigu. Taakku assigiinngitsunik sammiveqarneri annerusumik itisilerlugit nalunaarusiami sammivagut.

Aningaasaqarnermut siunnersuisoqatigiiffiup naalakkersuisut inatsisissatut siunnersuutaat tapersersorpaat.

- Naalakkersuisut aningaasaqarnermut inatsisissatut siunersuutaat 2011-moortoq oqimaaqatigiittutut isikkoqarnera siunnersuisoqatigiinninngaanniit ilassilluarparput. Akisussaassuteqartumik ingerlatsinermut tikkuussisuummat, Ulla Lynge oqarpoq.

Aningaasaqarnermut siunersuisoqatigiit nalunaarusiaat sapaatip akunneri marluk missaat qaangiuppat saqqummiunneqassaaq.

Siunnersuisoqatigiit ilimagaat Kalaallit Nunaanni isertitat ukiuni tulliuttuni amerlerialaartassasut.