Nunarput 2016-mi angalaffissatut pitsaanerpaanut ilaasoq
Nunarpummi 2016-mi angalaffissatut pitsaanerpaanut ilaavoq. Qaammammut saqqummersartoq National Geographic Traveler taama isumaqarpoq.
Atuagassiap nuannarineqaqisup Kalaallit Nunaat nunani takornariagassatut pilerinarnerpaatut 20 ilaannut aappaagumut ilannguppaa.
Taamaammat Kalaallit Nunaanni takornariaqarnermi ataatsimiititaliami, Visit Greenlandimi nuannaartupilussuupput, nunarpummi aappassaanik takornariagassaqqissutut innersuussutigineqarmat.
AAMMA ATUARUK Takornariarfissanik najoqqutassiap Nunarput piukkunnarnerpaanut qulinut ilannguppaa
- Uatsinnut assut ataqqinaataavoq, National Geographic Travelerip Kalaallit Nunaat nunani 2016-mi takornariagassatut ilanngussimammassuk, Visit Greenlandimi pisortaq, Anders Stenbakken oqarpoq.
Taassuma ilaatigut tikkuarpaa, Kalaallit Nunaata nunarsuarmi angalaffissaqqissutut piukkunneqarnera assigiinngitsutigut sammineqarluarnera pissutaasunut ilaasoq.
Timmisartut amerlanerusut aallartarnerat, nutaanik aqqutissaqalerneq, amerlanerusunillu pitsaanerusunillu tikitassaqalerneq misigisaqarsinnaanerlu, nunarsuarmilu angalanissamik innersuussisartut Kalaallit Nunaat pilerinarnerusunngortissimavaat. Tamannalu Nunatsinni angalanissami takornariarfissatsialattut taaneqartariaqartoq, pisortap naggasiutigaa.
Kalaallit Nunaat aamma qanittukkut Lonely Planetimi nunani qulini takoriagassaqqissutut ilaatinneqarpoq, National Geographicillu saqqummersittagaani Kalaallit Nunaat inuunerup ilaani tikittariaqakkat 50-it ilaanniitinneqarpoq.