Nunarpunngooq immussualiorsinnaasariaqarpoq

Nunatta pissarititaanik atorluaanerusoqarsinnaasoq nutaaliortoqartariaqartorlu isumassarsiorluni angalaqataasup aappaa, Kulturip Illorsuani Katuap igaffiani pisortaq Aage Lennert Olsen isumaqarpoq.

- Isumaqarpunga nunatsinni nerisassiortariaatsit amerlanerit atorneqartariaqartut. Periuserineqarnerupput pujoorinerit panertitsinerillu. Nalunngikkaluarpara mamarineqarluartut. Kisianni taakkua qaangertariaqarpagut siuarsarusukkutta nerisassiornerup tungaatigut, Aage Lennert Olsen taama oqarpoq.

Nunatta imminut nerisassatigut pilersornissaa Aage Lennert Olsenip takorluugaasa ilagaat. Isumassarsiaasalu ilagaat kujataani immussuarnik sanaartortoqalersinnaasoq, Frankrigemimi takusimavaa franskit immussuarnik assigiinngitsorpassuarnik sanaartortut.

Igaffimmi pisortap isumassarsiami ilaat aappaagu nerisassiorneq pillugu Narsami naapisimaartoqalerpat misilikkusuppaa, tassa tuttu ilivittoq pujooriarlugu qaaqqusanut sassaalliutigalugu.

-  Takuarput nersussuaq ilivitsunngorlugu pujoorlugu uninngatinneqartoq, soorlu aamma maani taamaaliorsinnaasugut. Tuttu ilivitsoq sassaalliutigineqarsinnaavoq, inuit eqqannguani aggorlugu iffiaq qaqortulerlugu, tassa taamatut mamarunartupilussuuvoq, Aage Lennert Olsen oqarpoq.

Nerisassiornerup iluani namminersortuaqqat Europami tamalaaneersut 200-300 missaanniittut Frankrigemi slowfood-festivalimi peqataapput, inuillu 20.000 missaanniittut alakkaasimapput.

Angalaqataasup aapparaa igasoq Ilulissani namminersortoq Inunnguaq Hegelund, taassumalu festivalimi takusaasa ilagivaat neqaarniaq aalisakkanik neqinillu ooqanngitsunik ineriikkanillu tuniniaasoq:

- Aalisakkat neqillu nutaat ooqanngitsut ineriikkallu tuniniartarpaat. Inuit isigisinnaassaannik aalisakkat neqillu piareersarneqartarput. Inuillu nammineq aalajangertarpaat ooqanngitsunik ineriikkanilluunniit pisissanerlutik, Inunnguaq Hegelund oqarpoq.

Igasut Inunnguaq Hegelund Aage Lennert Olsenilu aappaagu isumassarsiorlutik angalaqqinniarput, tamatumuuna nunarsuaq tamakkerlugu peqataaffigineqartumut Italiami slowfood-festivaleqarnerani peqataassapput.

Angalasimasut isumassarsiatik ingerlateqqinniarlugit oqalugiassapput, Inunnguaq Hegelund Ilulissani Aage Lennert Olsenilu Nuummi.