Nunaqarfinnut aningaasaliussat Sermersuumi amerlineqarput
Kommuneqarfik Sermersuumi nunaqarfinnut aningaasaliussat amerlineqarput, taakkualu kultureqarnermut, timersornermik suliniutinut ilaatigut atorneqarsinnaallutik.
Allattoq Elisa Isaksen
maajip 19-at 2010 05:53
Nunaqarfinnut aningaasaliussat 2010-mi 50 procentinut, tassa 2,7 millionit koruunit missaannut amerlineqarput.
Nunaqarfinnik aqutsisut tassaapput nunaqarfinnut aningaasaliussanik namminneq oqartussaallutik atuisussat, taakkualu kultureqarnermut, inunnik qaammarsaanermut, timersornermik suliniutinut, najukkani inuussutissarsiutitut pilersaarutinut aammalu inunnik isumaginninnermut suliniutinut ilaatigut atorneqarsinnaallutik.
Nunaqarfinnut aningaasaliussat tassaapput kommunimi illoqarfinnut nunaqarfinnullu tamarmiusunut kommunip nalinginnaasumik ingerlatsinermut aningaasartuutaasa qaavinut ilanngunneqartussat.
Isumaqatigiissut borgmester Asii Chemnitz Narupimit nunaqarfinnilu sinniisussanit arfineq-pingasuusunit atsiorneqassaaq.
