Nunaqarfinnut angallassineq isumannaarneqarpoq

Nioqqutissanik ilaasunillu nunaqarfinnut angallassineq apriilip aallaqqaataa aallarnerfigalugu isumannaarneqarpoq. KNI Pilersuisoq A/S aamma Royal Arctic Line A/S isumaqatigiissuteqarput, nunaqarfinnut assartuineq Royal Arctic Linep ingerlatilissagaa.

Arctic Umiaq Linep ilaasortaataata 'Sarfaq Ittuup' sapaatip-akunneri tamaasa marloriarluni Arsuk, Qeqertarsuatsiaat aamma Kangaamiut tikittassavai. Nunaqarfiit sinneri Nunatta Qeqqaniittut Marie Martec-ip Angaju Ittuullu paarlagaallutik sapaatip akunneri tamaasa marloriarlutik tikittassavaat, taakkualu tamarmik aqqaneq - marlunnik ilaasoqarsinnaapput.

Qeqertarsuarmi nunaqarfik Kangerluk ullut 14-ikkaarlugit Aqqaluk Ittummit tikinneqartassaaq, taannalu aqqaneq-marlunnik ilaasoqarsinnaavoq.

Tasiilap eqqaani nunaqarfiit pisarnermisut Johanna Kristinamit isumagineqartassapput.

Nunaqarfinnut assartuineq ukioq 2008-mit 2010-mut ingerlasussaq pillugu Royal Arctic Linep Namminersornerullutik Oqartussanut

isumaqatigiinniarnini aallartereerpaa.