Nunaqarfinni tunisassiorfiit matuneqassagaluarpata iliuusissat itigartitsissutigineqarpoq

Matumani 2009-mut aningaasanut inatsisissamut allannguutissatut siunnersuut nr. 150 pineqarpoq.

Siunnersuutip itigartinneqarnissaa aningaasaqarnermut ataatsimiititaliamit innersuussutigineqarpoq, aningaasaqarnermut ataatsimiititaliap siulittaasuata; Augusta Sallingip sooq taamatut innersuussuteqarsimanertik ima oqaatigaa:

Sipaarutissanik annertuunik ujartuinermi aningaasartuutissat nutaat qanoq ilillugit pinngitsoorneqarsinnaanersut ilanngullugit misissugassaavoq, Augusta Salling oqarpoq.

2009-mut aningaasanut inatsisissamut allannguutissatut siunnersuummut normu 150 –imut aningaasaqarnermut ataatsimiititaliap sooq itigartitsinera Augusta Sallingip taama nassuiarpaa. Siunnersuut Naalakkersuisunit saqqummiunneqarpoq, innersuussutigineqarlunilu, nunaqarfinnut tunisassiorfinnik matusiffigineqariaannaasunut ukiunut sisamanut nunami suliffinnut 2 millionit koruuninik aningaasaliisoqassasoq. Kisianni siunnersuut aningaasaqarnermut ataatsimiititaliamit itigartinneqarpoq, nunami sullivinnut naammattunik aningaasaliisoqareersoq isumaqartoqarmat.

Augusta Salling ima oqarpoq: konto-mi pioreersumi aningaasaliissutaasut iluanni suliassaq naammassineqarsinnaasoq oqarpugut, taamaattumillu aningaasaqarnermut ataatsimiititaliap inatsisartunut taamatut isikkoqartillugu itigartinneqassasoq siunnersuutigaa, taamalilluni siunnersuutip itigartinneqarnissaa inatsisartut naalakkersuisullu akuersaarpaat “ Augusta Salling taama oqarpoq, aamma taanna isumaqarpoq, nunaqarfinni tunisassiorfinnik matusisoqaratarsinnaanera, aningaasanut inatsisissamut allannguutissatut siunnersuummut normu 150-imut aningaasaqarnermut ataatsimiititaliap itigartitsineranik patsiseqanngitsoq.

Augusta Salling ima oqarpoq: ukiormanna ukiullu siuliinilu Arctic Green Food-ip tunitsiviit ingerlanniarneqarneranni aningaasat toqqaannartumik tutsiffissaanut tutsittarsimasaat misisssoreerlugit, naliliineq qanoq annertutigisumik tapiissutit ingerlanneqassanersut inissinneqarnikuuvoq” Augusta Salling oqarpoq. “ Aningaasaliissutit tunngavigalugit sukaterinermikkut tunitsiviit ammaannarnissaat soqutigisarisusssaagamikkit namminneq tamanna isumaginiartussaassavaat”

Aningaasaqarnermut ataatsimiititaliap siulittaasua Augusta Salling taama oqarpoq, erseqqissarlugulu aningaasanut inatsisissap pingajussaanneernerani, inatsisartut naalakkersuisullu allannguutissatut siunnersuummut itigartitsisut.