Nunaqarfinni talittarfeqarnikkut aaqqiissuteqarnissamik siunnersuut itigartitsissutigaat

Nunaqarfinni talittarfeqarnikkut puttasoqarnikkullu aaqqissuussisoqarnissaanik nuna tamakkerlugu pilersaarusiornissamut Naalakkersuisut peqquneqarnissaannik Inatsisartuni ilaasortaq Siumumeersoq, Doris Jakobsen siunnersuuteqarpoq, siunnersuutaalu Inatsisartut ullumi ataatsimiinneranni, Naalakkersuisunit amerlanerussuteqartunillu taperserneqanngilaq.

-Nunaqarfiit ilaat umiatsianulluunniit puttasoqanngillat talittarfeqarnatillu, tamannalu innuttaasunut pitsorluttunnut meeqqanut utoqqarnullu ulorianartutut oqaatigisariaqarpoq, Doris Jakobsen tunngavilersorpoq.

Umiarsulivinnik pitsanngorsaanissamik pisariaqartitsineq Naalakkersuisunit arajutsisimaneqanngilaq, tamannalu pillugu umiarsualivinnut tunngasut ataavartumik pilersaarusiorfigineqarnerannut, Inatsisartut 2006-imi upernaakkut ataatsimiinneranni saqqummiunneqartumut ilaatinneqartut, Attaveqarnermut Naalakkersuisoq Kim Kielsen ilaatigut taama akissuteqarpoq.

Aamma takornariaqarneq eqqarsaatigalugu Nunatta kujataani puttasulersuinissaq pilersaarutigineqartoq Angallannermut Naalakkersuisoq Kim Kielsen oqarpoq.

Nunaqarfiit arfinillit Namminersornerullutik Oqartussanit puttasulerneqarsimasut tassaapput:

Arsuk, Iginniarfik, Akunnaaq, Ikamiut, Kitsissuarsuit aamma Upernavik Kujalleq.