Nunaqarfinni illuliortiternernut aserfallatsaaliinernullu aningaasaliissutit ikilineqarput
Kalaallit Nunaanni Nunaqarfiit peqatigiiffiata siulittaasua Jens Meeraq Lyberth oqarpoq naalakkersuisut nunaqarfinni aningaasaliissutinik ikililiiniarnerat akuersaarneqarsinnaanngilluinnartoq. – Ukiuni kingullerni nunaqarfinni suugaluartulluunniit aatsaat isasuuleraangata naalakkersuisut aningaasaliiminertarput, tamatuma kinguneranik kiffartuussinerit isumaginninnerlu ajorsilluinnarnikuupput, Jens Meeraq Lyberth, Kalaallit Nunaanni nunaqarfiit peqatigiiffiani siulittaasoq taama oqarpoq. Jens Meeraq Lyberth oqarpoq nunaqarfiit amerlanersaanni illut aserfallassimaqisut amerlaqisullu nutaanik taarsereersimasariaqaraluartut. – Nunaqarfinni arlaannik pinartumik tutsiuttoqaraangat naalakkersuisut aaqqiipallattarput pisulli tusagassiutitigut nipangiunneqartullu puigortarpaatigut, Jens Meeraq Lyberth oqarpoq. Jens Meeraq Lyberth isumaqarpoq nunaqarfinni piviusut eqqartorneqaleraangata naalakkersuisut nipangersaallutik aningaasaliipallatsiartalersut nunaqarfiillu tusagassiutini nipangiunneqarniariartut nunaqarfinnut aningaasaliissutinik ikilisaallutik aallartittartut. – Nunaqarfinni suut tamarmik ajorsiartorput isumaqartalerpungalu nunaqarfimmiit illoqarfimmut nuuttoqaraangat naalakkersuisut nuannaajallattarsimassasut, Jens Meeraq Lyberth oqarpoq.
2007-mi nunaqarfinni isorliunerusunilu illuliortiternernut 66 millioni koruunit aningaasaliissutigineqarput taakkulu aappaagu 51 millioni koruuninut ikiliniarneqarput.
