Nunaqarfinni eqqaaveqarfiit pitsanngorsaavigeqquai

Nunatsinni illoqarfinni nunaqarfinnilu eqqaaveqarnerup pitsanngorsaaviginissaanut naalakkersuisut aningaasaliiumannginnerat, Kommune Kujallermi ikaarsaariarnermut ataatsimiititaliap siulittaasuata, Simon Simonsenip aarlerinartoqartippaa.
Allattoq Najaaraq Egede
juulip 11-at 2008 05:13

Piffissami matumani gassimik silaannarmik kissakkiartortitsisumik CO2-mik aniatitsinerup minnerulersinneqarnissaata oqallisigineqaleruttorfiani aamma eqqakkanik ikuallaanermi mingutsitsisarnerup eqqumaffigineqaleruttorfiani, Inatsisartut 2009-mut aningaasanut inatsisissaanni nunatsinni eqqakkanik isumaginninneq en ørinnguamilluunniit aningaasaliiffigineqanngimmat, Simon Simonsenip paasiuminaatsippaa.

-“Eqqagassalerineq pillugu Pilersaarut” kommuninut tusarniaassutigineqaraluarpormi, kikkulli akiliissanersut allassimasoqanngitsoq, Simon Simonsen allappoq.

Naalakkersuisut aningaasatigut akisussaaffitsik kommuninngortussanut nutaanut sisamaasunut isumagisassanngortinniaqinammassuk, Simon Simonsenip aarlerinartoqartippaa.

- Pissutsit taamaattut attatiinnarneqarsinnaanngimmata eqqagassalerineq pillugu pilersaarutip nutaap aningaasatigut nammagassartai pillugit piviusorsiortumik Naalakkersuisut isumaqatiginninnialeqqullugit piumaffiginiarpakka, minnerunngitsumik ullumikkut eqqakkanik ikuallaasoqartannginneratigut aaqqinngitsuugaasimasut aaqqinneqarnissaat pillugit naalakkersuisut isumaqatiginninnialeqqullugit piumaffigaakka, Kommune Kujallermi borgmesterinngortussaq Simon Simonsen naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq