Nunaqarfinni atuarfiit puigorpaat

Atuarfiit atuartullu inaanni illut pitsaassusaasa misissornissaat Naalakkersuisut aningaasaliiffigaat. Nalunaarsuinermili nunarfinni atuarfiit pitsaassusaat ilanngunneqassanngilaq.
Allattoq Noah Mølgaard
maajip 28-at 2011 07:50

Inatsisartut aningaasaqarnermut ataatsimiititaliaata akuersissutigaa atuartut inaat kollegiallu pitsaassusaasa misissornissaannut aningaasaliissutit 2,5 millioner koruuninik qaffanneqassasut. Taamattorli nunaqarfinni atuarfiit illutaat nalunaarsuinermi ilanngunneqassanngillat.

Aningaasaqarnermut ataatsimiititaliap akuersissutigaa aningaasanik nuussisoqassasoq isorliunerusuni nunaqarfinnilu sanaartornissanut atugassaagaluit atuartut inaasa kollegiallu pitsaassusaasa nalunaarusiornerannut atugassanngorlugit.

Tamanna akuerineqaraluartoq taamaatoq aningaasaqarnermut ataatsimiititaliaq isornartorsiuivoq nunaqarfinni atuarfiit nalunaarsuinermi ilanngunneqassanngimmata.

- Tamanna naapertuunnersoq ataatsimiititaliap qularaa. Taamaattumillu nunaqarfinni atuarfiit suliniummut ilanngunneqassanersut qanorlu annertutigisumik tamanna pissasoq isumaliutigeqqullugu Naalakkersuisut ataatsimiititaliamit kaammattorneqarput. Tamatuma saniatigut atuartut inaasa perorsaanermik siunertaasa qaffassarnissaannik siunertaq nalunaarsuinerup suliarineqarnerani aamma ilanngunneqassasoq ataatsimiititaliamit kaammattuutigineqarpoq, aningaasaqarnermut ataatsimiititaliap siulittaasua Olga P. Berthelsen oqarpoq.

Aamma atuaruk