Nunaqarfinni aqutsisut kommunalbestyrelsenut sunniuteqarusupput

Kommunalbestyrelsenut ilaasortanngorniarluni qineqqusaarnerit sukataarutigineqaleruttortut, nunaqarfinni aqutsisunut aamma qinersisoqartussaavoq.

Kalaallit Nunaani nunaqarfinni 65-usuni aqutsisut kommunalbestyrelsenut sunniuteqarsinnaanerat ajornakusoorsinnaasarpoq.

Nunaqarfiit taakkununnga ilanngullugu Aappilattoq Upernaviup eqqaaniittoq taasuma ineriartortinnissaa nunaqarfiup aqutsisuata suliassaasa pingaarnersaraat. Aappilattoq ineriartortinneqassappat kommunalbestyrelse suleqatigilluinnarneqartariaqarpoq.

Nunaqarfinnili aqutsisut ilai kommunalbestyrelsimut sunniuteqarniartarnerat aporfeqartarpoq.

- Ataatsimut nalilissagaanni suli pitsanngorsagassaavoq, Kalaallit Nunaani nunaqarfiit peqatigiiffianni siulittaasoq Jens Kristian Therkildsen Qanooruumi marlunngornermi taama oqarpoq.

AAMMA ATUARUK Nunaqarfinni suliffissaaleqisut amerleriartut

Kommunalbestyrelsimut suliakkiutigineqartartut aamma saaffiginnissutigineqartartut pillugit akiniaasaartarnerat takornartaanngilaq.

- Ilaatigut akineqarnissaat takkuittoorneqartarpoq, taamaalillunilu nunaqarfinnut aqutsisunut kingunipiloqartarluni, Jens Kristian Therkildsen oqarpoq.

Akiniaasaartarnerlu kisimi ajornartorsiutaanngilaq. Aappilattumi Naajaani Innaarsunnilu nunaqarfinni aqutsisunut siulittaasup Karl Petersenip kommunalbestyrelsimut suliakkiissutai nalilersorneqaraangata Karl Petersen peqataatinneqarneq ajorpoq.

- Tassami suliakkiissutigisagut nalilersorniarneqaleraangata uagut Qaasuitsup kommunianit malinnaatinneqartoq ajorpugut.

Taamaammallu piumasarinikuugaluarpara nunaqarfinni sanaartugassanik ataatsimiititaliaq oqaluuserisaqaraangata aqutsisut siulittaasui toqqaannartumik isumasiorlugit suliassanik suleqatigisinnaagaluaraat, Aappilattumi Naajani Innarsunnilu nunaqarfiit aqutsisuini siulittaasoq taama oqarpoq.

Aningaasallu nunaqarfinnut suliniutissanut illikartinneqartartut hurraartuutissaavallaanngillat.

- Tassami sumiluunniit immaqa oqarsinnaavugut aningaasaliissutit takkukkaangata naammagisimaarinninneq killeqarsinnaasarpoq. Taanna qularutissaanngilaq, KANUNUPEmi siulittaasoq Jens Kristian Therkildsen taama oqarpoq.

Naak nunaqarfiit kommuniniit kommuninut atugaat assigiinngikkaluartut, nunaqarfinni aqutsisut kommunalbestyrelsinut sunneeqataasinnaanerat assigiittariaqaraluartoq, siulittaasoq isumaqarpoq.

- Assigiissaarisoqarpat isumaqarpunga tusaaniarneqarnerit tassani pitsaasut tungaanut alloriartoqarsinnaasoq, KANUNUPE-mi siulittaasoq oqarpoq.

Qeqqata Kommuniani 1,1 mio. koruunit, Kommuneqarfik Sermersuumi 2,4 mio. korununit kiisalu Kommune Kujallermi 564.000 koruunit nunaqarfinni aqutsisunut immikkoortinneqarlutik.

Kommunimili nunaqarfeqarnerpaami, tassa Qaasuitsup Kommuniani aningaasat 2017-imut qanoq amerlatigisut illikartinneqarsimanersut paasiniaraluaratsigu iluatsinngilarput.