Nunaqarfimmiuusimasoq: Aningaasarsiorfissalimmut nuugitsi

Illoqarfimmut aningaasarsiorfissalimmut nuugitsi, taama kajumissaarivoq Nuka Mathiessen, Alluitsup Paa suliffissaaleqiffiummat, uini ernertillu 15-ninik ukiulik, Qasigiannguanut siorna decembarimi nuuttut. Qaasuitsup kommuniani borgmesterip Jess Svanep aningaasarsiorfissalinnut nooqqusilluni, radioaviisimi ippassaq kajumissaarinera, Nuka Mathiessenip assut taperserpaa.
Allattoq Mads Lynge
januaarip 24-at 2009 18:15

Nukap uia, Alluitsup Paani suliffissaqanngimmat Nukap ullut 14-ikaarlugit aningaasarsiai naammattusaaqqissaartariaqartarsimavaat inuuniarnerminni:

- Nunagisaq ungasikkaluartoq kisianni misigisaq nuanneqigami kaammattuutigerusukkaluaqaara taamatut misileeqqullugit. Suliffissat inissaqarniarnerlu maani ajornanngeqimmata, Nuka Mathiessen oqarpoq, nangipporlu:

- Uiga aamma nuannaaqaaq, peqqissiminngeqaagullu, nuna tikitarput aamma nuanneqigami. Uigalu marluulluta suliffeqaratta aningaasaqarniarnerput ilorfaallaqaaq, Nuka Mathiessen oqarpoq.

Alluitsup Paa 330-t missaannik inoqarpoq. 18-ileerersimasuniit 256-it sulisinnaasuupput, taakkunanit suliffissaaleqisutut naqittitarput 52-it.

Nuttarsinnaanermut aningaasateqarfik iluaqutsiullugu Qasigiannguani Royal Greenlandimut suliartortut katillugit 29-iupput.

Tasiilamiit, Narsamiit, Qaqortumiit, Paamiuniit, Maniitsumiit, Kangaatsiamiit allaniillu aamma suliartortoqarsimavoq. Immaqa Qasigiannguarmiut qangamut aliannaarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq