Nunaqarfimmiut timersornermut atortunik amigaateqaqaat
Nunatta kitaani nunaqarfinni 48-ni atuarfiit timersornermut atortoqarnerat, Peqatigiiffimmit Atuarfimmi Timersornermit misissorneqaqqammerpoq. Misissuinermilu paasisat peqatigiiffiup uissuuminarluinnartutut nalilerpai.
- Timersornikkut atortorissaarutinik amigaateqarneq angeqaaq. Atortuutit piffissap ingerlanerani aserorsimanngikkunik nungullavissimasarput. Taamaammat pinngussanik pissarsiniartoqarnera tapersersorneqaqalunilu qujarulluinnarneqarpoq, peqatigiiffimmi siulittaasoq Kim Godtfredsen oqarpoq.
Nunaqarfinni atuarfiit 95 procentii sinnerlugit atortuuteqanngilluinnartut, misissuinermi paasineqarpoq. Aammattaaq atuarfiit 75 procenti sinnerlugit eqaarsaarutinik nalinginnaanerpaanik, soorlu arsanilluunniit, peqanngillat.
Naak nunaqarfimmiut kalaaliminertornerugaluarlutik aamma illoqarfimmiunut sanilliullugit peqqinnanngitsunik soorlu mamakujunnik, sodavandinik nerisassanillu kissariaannarnik nerinerusut siornatigut misissueqqissaarnerup takutippaa.
Nunaqarfimmiuaqqat illoqarfimmiunut sanilliullugit timiminnik aalatitsinerat annikinneruvoq. Taamaammat nunaqarfinni periarfissaluttuni, siunissaq eqqarsaatigalugu, innuttaasut akornanni pualavallaarnerup kingunerisaanik nappaalanerit annertusiartuinnarnissaat ernummatigineqarpoq.
Kommuneqarfik Sermersuup nunaqarfiini atuarfiit pinngussanik timersuutinillu qaammatit sisamat matuma siorna agguarneqarput.
- Atuarfiit pisortaat unnersiorput, anitsiarfinni aliikkutassaqarlualernerup, timimillu aalatitsilernerup kinguneranik meeqqat tiimini malinnaanerulerlutillu eqqissisimanerulersimasut, tamannarpiaavorlu pinngussanik agguaanermi siunertarineqartoq, Kim Godtfredsen oqarpoq.
Karsi nunaqarfimmut ataatsimut nassiunneqartartoq 15.000 koruuninik naleqarpoq, peqatigiiffiullu Atuarfinni Timersornerup nunaqarfinnut 40-nut nassiussuinissaq anguniarpaa.
Nunaqarfinni meeqqat atuarfiini atuartut 1431-upput.
