Nunaqarfimmiut: Naalakkersuisut najukkavut inuerusarpaat
- Nunaqarfeqarpoq, sanaartugassanik unitsitsisimanermit annertuumik eqqugaasimasunik, Kalaallit Nunaanni Nunaqarfiit Peqatigiiffianni siulittaasoq, Jens Kristian Therkelsen oqarpoq.
Nunaqarfimmi aqutsisuneersoq alla, Kulusumiu Pile Maratsi, taama naliliinermut isumaqataavoq.
- Nunaqarfinni sanaartugassanik ukiuni tulliuttuni naalakkersuisoqatigiit sunik siunerfeqarsimanerat takorloorsinnaangilara.
Nunaqarfinni pisortat sanaartugasdsaat ukioq manna ikisimanersut Radioaviisip aaqqissuunnerani erseqqissumik uppernarsinngilarput. Kisianni siorna akuersissutigeeriikkat ilaasa 40 millioni koruunit atorneqarnissaanut Aningaasaqarnermut ataatsimiititaliaata apriilip 29-ani akuersissutigaa.
Nunaqarfimmiulli sinniisaasa aalajangiusimavaat, nunaqarfinnut aningaasaliissutit siornanernit ikinnerusut. Tamannalu nunaqarfinniit isigalugu ima kinguneqarpoq:
- Illoqarfinnut nutserusaarneq, ulloq manna tikillugu suli ingerlasoq, unikkallartussaangitsutut isikkoqarpoq, Jens Kristian Therkelsen oqarpoq.
- Isumaqarpunga, nunaqarfiit ipitikkiartuaarneqarnerat politikkikkut anguniarneqartoq ersarissiartuinnartusaassasoq. Kisianni Nunaqarfimmiut ilaqutariit tamarmik suliffissaqarpat? Illussaqartinneqarpat? Meeqqerivinni inissaqartitsisoqarpa? Assigisaallu allat pisariaqartut illoqarfinni piareerimasuutigineqarpat? Pile Maratse aperaaq.
Jens Kristian isumaqarpoq, nunaqarfimmiut Naalakkersuisullu attaveqatigiinnerat pitsaanerulertariaqartoq.
- Naalakkersuisut siulii eqqarsaatigiganni, nunaqarfiit peqatigiiffiannut attaveqartarneq ajorseriarsimasoq isumaqarpunga.
Nunaqarfiilli peqatigiiffianni siulittaasup nassuerutigaa:
- Taamatut attaveqarpallaannginermi peqatigiiffipput pisooqataasinnaavoq.