Nunaqarfimmiut misissorneqarnissaminnut soqutiginnilluarput

Kujataani nunaqarfinni aqqaneq marlunni tarrarsortilluni sakialluummik TB-imik misissuineq soqutigineqarluarpoq. Nunaqarfinni innuttaasut 69 procentii misissortipput, tassa inuttaasut 549-t mississorneqarmata.
Allattoq Jaaku Lyberth
septembarip 22-at 2010 11:26

Misissortittut ilimagisamit amerlanerusut, mississuinermi ataqatigiissaarisoq Dorthe Ludvigsen Nanortallup napparsimaviani sulisoq oqarpoq.

Angallat Minna Artek angallatigalugu kujataani nunaqarfinni aqqaneq marlunni misissuineq septemberip pingajuaniit 16-ata tungaanut ingerlanneqarpoq.

- Innutaasut peqqissutsiminnik soqutiginninnerisa annertusinikuunera pissutigalugu TB-mut misissortittut amerlapput, Dorthe Ludvigsen oqarpoq.

Missuissineq kingulleq ukiut marluk matuma siornatigut ingerlanneqarmat kujataani innutaasut 62 procentii misissortipput.

- Innuttaasut iluaraat misissuiartortoqarmat, Dorthe Ludvigsen oqarpoq.

Kujataani nunaqarfinni innutaasut tarrarsorlugit sakialluummik TB-mik misissorneqarnerat maanna Dronning Ingridip napparsimavissuani misissorneqarput.

Kujataani illoqarfinni innuttaasut qaammatip tulliani tarrarsorlugit sakiallummut TB-imut misissorneqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq