Nunaqarfimmiut Hans Enoksen ataatsimeeqatigaat
Hans Enoksen maanna Ilulissaniippoq. Nunaqarfimmiullu kattuffiat KANUNUPE ataatsimeeqatigalugu. Ataatsimiinnermi aaqqissuussaanerup nutaap eqqunneqarnera nunaqarfimmiunut qanoq sunniunnersoq ataatsimiissutigineqarpoq.
Oqaatigineqarpoq ataatsimiinneq aallartilaaginnartoq nunaqarfimmiut naammagittaannerat malunnarsereersoq.
Nunaqarfimmiut puigorneqarsimallutik misigisimapput.
Misigisimapput nunaqarfinnut nioqqutissanik assartuinernut, inuillu angallanneqarnerinut tunngatillugu qatangiinnarneqartarlutik. Taamaattumillu maanna nunaqarfimmiuniit piumasarineqalerpoq, isumaqatigiinniartoqartillugu namminneq aamma sunniuteqaqataanerutinneqartariaqarlutik, tamannalu tunngavigalugu KNI nunaqarfimmiunit attavigineqareersimavoq.
Ilulissani ataatsimiinnermi nunaqarfimmiut kattuffiannit Hans Enoksenimut sakkortuumik erseqqissaatigisaqattaarneqarpoq namminneq ulluinnarni atukkatik pineqartillugit iluamik tusarlerneqarnerusariaqarlutik. Taamatuttaaq kommunit kattussuunnissaannut tunngatillugu paasitinneqarluartarnissartik kissaatigaat.
Naalakkersuisut siulittaasuata Hans Enoksenip nunaqarfimmiullu kattuffiata KANUNUPE-p ataatsimiinnerminni akit assigiikkunnaarsinneqarnerat aamma oqallisigissavaat.
