Nunaqarfimmiut illoqarfimmut atuariartoraangamik atugarisaat iluarneq ajorput.
Inuit Ataqatigiit ilinniartitaaneq pillugu oqaaseqartartuat, Juliane Henningsen, isumaqarpoq, meeqqat atuarfiini atuartut sumiikkaluartulluunniit pitsaasunik avatangiiseqarnissaminnik piumasaqarsinnaatitaasariaqartut.
Uummannap nunaqarfiini atuartut Juliane Henningsenip tikeraarsimavai, pissutsillu naammaginngilluinnarpai.
- Nunaqarfimmiut meerartai peqqissut allamut atuariartortikaangatsigik, pitsaasumik avatangiisiliinissatsinnut pisussaaffeqarpugut, Juliane Henningsen oqarpoq.
Taamaattumik kommunini naalakkersuinermik suliaqartut, kommuniminni nunaqarfimmiut atuariartornerminni najugarisartagaanni pissutsinik misissuinissaannik kajumissaarivoq.
- Meeqqat 15-t inorlugit ukiullit 4000-t nunaqarfinni najugaqartut nunatsinni naatsorsueqqisaartarfiup 2005-imi kisitsisaataanni takuneqarsinnaasoq, Juliane Henningsen oqarpoq.