Nunaqarfimmi tunisassiorfiliornissaq akuerineqartoq
Halibut Greenlandip nunaqarfimmi Aappilattumi 160-nik innuttaqartumi tunisassiorfissamik sanaartorluni aallartinnissaminut akuersissutit allat, soorlu nunaminertamik atuinissamut akuersissutit, utaqqimaaginnarpai.
- Tassa killeqassaaq Nunatsinni taamatut aalisarfiit ilarujussuini kisermaassisoqarnera. Taanna allornerit ataasiakkaarlugit allanngortikkiartuaassuarput, Niels Thomsen, Halibut Greenland pisortaq oqarpoq.
Halibut Greenlandip akuersissutit allat pissarsiariniariarunigit Aappilattumi tunisassiorfimmik sanaartorneq aallartikkusuppaa:
- Tassa fabrikkip sanaartornissaa soorunalimi piaartumik aallartinniarsarissuarput. Tassani apeqqutaassaaq ilaatigut soorlu arealtildelinginut tunngasut. Taakkua tamarmik inisseriarpata, taava piaartumik inississuarput. Naatsorsuutigivarput fabrikki 2016-imi naammassereersimalluni aalisakkanik pisiortorluni aallartissinnaassasoq, tunisassiorluni soorunami aamma, Niels Thomsen oqarpoq.
Aappilattumi tunisassiorfimmik sanaartornissamut akuerineqarnermi saniatigut Halibut Greenland tunitsivimmik umiarsualiinissamut aamma akuerineqarpoq. Tunitsivik tunisassiorfiup atulernissaata utaqqiisaarutaasumik atorneqarneqassaaq:
- Tassa piaarnerpaamik taanna Aappilattup saavanut inissikkusupparput. Tassa qaammatini ukunani qaninnerni, taanna naammassereerusupparput. Taamaattumik ulapputigissuarput angunissaa tikillugu, Niels Thomsen oqarpoq.
Aviisi Sermitsiaq tallimanngormat saqqummersoq najoqqutaralugu Upernaviup eqqaani 2012-mi qalerallit 6.215 tonsit tunineqarmata 77.991.000 million koruuninik isertitsissutaapput, Ilulissani 8.064 tonsit 141.585 million koruuninik isertitsissutaasimasut. Halibut Greenlandilumi Upernaviup eqqaani qaleralinnik niuernermut akuleruppat akit allanngorsinnaaneri Niels Thomsenip aamma eqqaavaa:
- Qalerallit akii uagut sumiluunniit ingerlatsigaluarutta, imaluunniit aalisakkat allat akii, imannak isumaqarfigisuaannarpagut aalisartut akinik pitsaasunik pisariaqartut. Avammut tunisinermut akit soorunalimi tassani qissiminneqartuaannasallutik. Aamma tassaniippoq aningaasartuuteqarpugut matusariaqakkatsinnik. Kisianni oqarsinnaagunarpunga ullumikkut kisermaassiffiusuni akuulerutta, taava aki nikittassasoq taanna naatsorsuutigineqassasoq, Niels Thomsen oqarpoq.
Halibut Greenlandip Ilulissani piginneqatigiiffittut ilusertik Upernaviup eqqaani tunisassiorfiliornissaminni aamma atorusuppaat. Aalisartut Upernaviup eqqaaneersut tunisassiorfissamut piginneqataarusuttut 50-it tungaannut nalunaareersimapput.
