Nunaqarfiit Siumumit illersorneqarput

Nunat piorsarsimasutut isigisut innuttami akilersinnaasutut akilersinnaanngitsutullu isigalugit immikkoortiterisumik ingerlatsineq ajorput, taama nipilimmik Siumup Inatsisartunut ilaasortaat qisuariaateqarput. Kalaallit Nunaanni Sulisitsisut Peqatigiiffiata nalunaarusiaani qulequtsiunneqarsimasup, 'Namminersortuuneq - suliassarujussuaq, ajornanngilarli'-mut qisuariarlutik.
Allattoq Apollo Jeremiassen
marsip 30-at 2010 17:14

- Inuiaat avinneqarsinnaanngillat akissarsiutaanerat akissarsiutaannginneralluunniit tunaartaralugu, Siumup siulittaasua Aleqa Hammond oqarpoq. Namminersornermut aningaasarsiorneq aqqutissaasoq Sulisitsisut Peqatigiiffiata nalunaarusiaata oqariartuutigineqarnera pillugu Siumut siulittaasua qisuariarpoq. Nalunaarusiami erseqqissaatigineqarpoq, nunaqarfiit aningaasarsiornermut artukkiisut, taamaalillutillu namminersornermut pakkersimaarinnillutik.

Nunaqarfinnik matooraaniarneq eqqartorneqartariaqanngilarluunniit, Aleqa Hammond isumaqarpoq. Naqissuserlugulu pissutsit piviusut aallaavigalugit sulineq ingerlasariaqartoq.

- Inuiaqatigiinni sumiikkaluartuniluunniit, innuttaasut ilaat allanut naleqqiullutik aningaasarissaarnerusarput, tamaattoqarneralu takornartaanngilluinnarpoq. Taamaakkaluartoq sumiiffinnik matooraasoqarneq ajorpoq. Nunarsuarmi nuna suna tusarneqarsimanerpa nunaqarfii illoqarfiilu imminnut akilersinnaasuinnarsuarnik ingerlatsiviusut? Aleqa Hammond aperaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq